KHAWTHLIR

VC-te kokhawm
Nimin khan Mamit Chhimveng YMA Hall-ah FOCUS Mizoram Project chungchangah District Level Consultation Meeting buatsaih a ni a, Mamit district-a VC president leh secretary-te an tel. FOCUS Mizoram project director RK Nithanga'n project a sawifiah a, "Project-in a tum ber chu - thingtlang lo neia ei zawng chhungkua 64,500-te thlai thar a tam zawk theih nana tihhmasawn leh kum tin lo hâl vanga sik leh sa inthlak danglam nasa lutuk tihziaawm a ni," a ti. VC tinte chu an khuaah Farmer Interest Group (FIG) din tura tih an ni.

Thisen pe
Chhiahtlang Kawnveng Pastor Bial KṬP-te chuan nimin khan blood donation camp an huaihawt a, Serchhip District Hospital tan thisen unit 32 an pe a, a petute mipa 22 leh hmeichhia 10 an ni.

Thupek pawtsei
Traffic SP chuan thupek chhuahin, Venghlui, Pi Pangi Peng bula culvert siamṭhat hna thawh a nih avanga Treasury Square leh Pi Pangi Peng, Venghlui/Upper Republic inkar kawnga 407 (truck) leh aia lian lirthei reng reng April 30, 2019 thleng tlan phal loh tih thupek a chhuah tawh chu May 15, 2019 thleng pawhsei a nih thu a tarlang. Thupek hian bus erawh a huam lo.

Bial Inkhawmpui
Mizoram Presbyterian Kohhrana pastor bial hrang hrangte chuan nizan aṭang khan an bial ṭheuhah bial inkhawmpui an hmang ṭan a, Pathianni zanah a ṭiak ang. Bial inkhawmpuiah hian vawiinah nilengin rorel inkhawm neih a ni dawn a ni.

E.Roll tlangzarh
State Election Commission ruahmanna angin, nimin khan Lawngtlai additional DC Dr Andrew H Vanlaldika chuan Lai Autonomous District Council (LADC) leh Chakma Autonomous District Council (CADC)-a MDC bial ruak pakhat ve ve hnawhkhah nana by-election neih turah electoral roll siam tharnaa behchhan tur draft electoral roll a tlangzarh. Paih, belh leh siamṭhat tur neite tan April 27 aṭanga May 1 chhung hun hawn a ni.

KV Paradise khâr
KV Paradise, Durtlang chu thil ṭul leh pawimawhah hman a nih dawn avangin April 27-29 chhung khâr a ni dawn a, mipui tan tlawh theih a ni dawn lo.