MPYCC-in dan loa sum enkawla an puh J Lalhmingliana bàn turin CM an ngen

Mizoram Pradesh Youth Congress Committee (MPYCC) chuan GAD Aviation Wing-a principal consultant J Lalhming­liana chu dan dik loa sum enkawl­ah an puh a, a hna aṭanga bàn tura ngenna nimin khan chief minister Zoramthanga hnenah an thehlut. Lehkha hi Chief Minister a pisaa a awm loh avangin a private secretary-in a dawng a ni.

MPYCC chuan, Chief Minister hnenah hian Lengpui Airport tihchangtlun leh thuam ṭhat chungchanga hmalak a tum dan chu lawm­awm an tih thu an tarlang a, "Hemi kawnga hma latu ber tur Pu J. Lalhmingliana, Wing Commander (Rtd), principal consultant atana appoint a nih pawh khan beiseina sang tak nen kan lo thlir a ni. Amaherawhchu, hun rei lote chhunga Pu J Lalhmingliana hmalak dan kan hriatin beidawnthlak kan ti hle a, sorkar tan pawh hmingchhiatna leh mualphona nasa tak niin kan hria," an ti.

MPYCC-in a puh dan chuan, J Lal­hmingliana hian April 9, 2019 khan helicopter hire man Rs. 16,72,720 leh consultancy firm pakhat pawisa Rs. Rs.39,70,000, a vaiin Rs. 56,42,720 a la a, April 10 khan consultancy firm aṭanga Rs. 45,35,300 la lehin, hengte hi ama mimal account ICICI Bank account no. 240701500605 ah a dah lut a ni.

Heng bakah hian, J Lalhming­liana hian C Ngunlianchunga, MLA helicopter hman (charter) man Rs. 1,20,000 chu Civil Aviation Wing account-a lut turin Ngunlianchunga'n blank cheque a pe a, J Lalhmingliana hian ama hming ziakin a bank account-ah a dah lut a ni.

C Ngunlianchunga helicopter hman man Rs. 1,20,000 hi helicopter neitu Pawan Hans hnena pek tur a ni a; consultancy firm pawisa chu hnathawh an zawh chiah loh pawhin Civil Aviation Wing-in an kawl ang a, an zawh fel huna pek mai tur a ni.

MPYCC chuan, J Lalhming­liana appointment order-ah pawh dikhlel a awm niin an hria a, "Civil Aviation Wing hi GAD hnuaia wing pakhat chauh a ni a, head of department chu GAD Secretary a ni. Hetianga HoD anga chhâl hi thil dik lo a ni a, Fundamental Rules, Financial Rules leh DPAR Office Memorandum kalh a ni," an ti a; Chief Minister chu J Lalhmingliana thil tih dan chhui chiang a, corruption case siamsak nghal tur leh a hna aṭanga bân nghal turin a ngen.

Congress party ṭhalaite hian J Lalhming­liana thil tih dan hi nimin vek khan Chief Vigilance Officer (Chief Secretary) leh Lokayukta Chairman hnenah an thehlut nghal.