World Intellectual Property Day hmang

Nimin April 26 kha World Intellectual Property Day a ni a, Mizoram Science, Technology & Innovation Council (MISTIC) hnuaia Patent Information Centre bultumin Directorate of Science & Technology conference room-ah hman a ni.

World Intellectual Property Day hi United Nations Organisation hnuaia pawl pakhat, World Intellectual Property Organisation (WIPO) bultumin khawvel hmun hrang hrangah hman a ni ṭhin a, kumina Day thupui chu 'Reach for Gold : IP and Sports' tih a ni.

Aizawla World Intellectual Property Day hmanna inkhawm hi Science & Technology senior scientific officer Samuel Lalmalsawma'n a kaihruai a; C Laltlanzuala, scientist-B (Patent Information Centre) chuan tun hnaia Mizorama intellectual property rights chungchanga hmalaknate sawiin, Mizo hnam puan chi hrang hrang - tawlhlohpuan, puanchei, ngotekherh, hmàrám leh pawndumte chu Geographical Indication dan hmanga humhalhna tura buaipui hna zawh ṭêp a nih thu a sawi.

Patent Information Centre-a project scientist Dr Lalruatfela Renthlei chuan Intellectual Property Day thupui 'Reach for Gold: IP & Sports' tih hmangin sport industry-te'n intellectual property rights péng hrang hrang - patent, trademark, copyright, broadcasting right, design right leh a dangte an hlâwkpui dan a sawifiah a ni.