Health department-a thawkten Hna leh sexual harassment zirho

Health department chuan nimin khan Health Services directorate conference hall-ah Health Services-a thawkte pual­in hna thawhna hmuna mipat hmeichhiatna lama pawi khawihna (sexual harassment) chungchanga zirhona an buatsaih.

Zirhona hi Health principal director Dr F Lallianhlira'n a kaihruai a; resource person Chuauzikpuii, Social Welfare officer pension-in sexual harassment leh a kaihhnawih thil pawimawhte sawiin, Health department-in hma an lak ṭhat thu a sawi. National Health Mission director Dr Eric Zomawia, Committee on Sexual Harassment of Women at Workplace chairman Dr Lalremmawii leh IDSP state nodal officer Dr Pachuau Lalmalsawma ten thu an sawi bawk.

Health department tarlan danin, kum 2013-a Sexual Harassment Act siam a nih hnuah he dan hi Mizoramah pawh April 2014 aṭang­in notification hmangin kalpui a ni a; hmeichhiate chungah mipat hmei­chhiatna lam hawia mawi lo taka khawsakna a thlen loh nan leh chutiang a thlen pawha a rang thei ang bera complaint siam a nih theih nan department tinah Committee on Sexual Harassment of Women at Workplace din vek tura tih a ni.

Committee on Sexual Harassment of Women at Workplace hi sorkar department chauh ni lo, private firm-ah pawh hna thawktu mi 10 chin awmnaah tawh chuan din vek tura tih a ni bawk.