Mizoram Assembly-in India danpui hnuaiah thuneihna sang bik a nei - Robert Romawia

MNF party chuan nimin khan an pisa, Mizo Hnam Rûnah inkhawm an buatsaih a, minister of state Robert Romawia Royte-in thu sawiin, MNF movement avangin Mizoram Assembly-in India danpui hnuaiah thuneihna sang bik a nei niin a sawi.

Robert Romawia Royte chuan, "MNF movement zarah India danpui hnuaiah state dangte neih loh chanvo ṭha em em 53rd. Constitutional Amendment Act, 2007 hmangin Article 371G kan nei a, kan sakhuana, kan hnam nun leh inrêlbâwlnate bakah, Zoram chhunga ram neitu nihna leh ram tihral chungchangahte Parliament-in dan siam mah se, Mizoram Assembly resolution hmangin kan pawmin kan thlauhthla thei a, heng subject-ahte hian min tilui thei reng reng lo a ni," a ti.

MNF party chu a din dan leh din chhan te, a huam chinte party dang aia danglam nia sawiin Robert Romawia chuan, "Zo fate zawng zawng a huap a, ramri a nei lo. Mizoram sorkar pawh hi sorkar danglam, state leh international ramri pêla Zo fate hmasawnna ngaihtuah mek­tu a ni. Zoram páwna Zo fate nena kan inkungkaihna leh an hmasawnna turin Zoramthanga kaihhruai sorkarin budget-a sum dahin hma a la dawn a ni," a ti a; chutiang chu sorkar hmasa lamin an la tih ngai loh thu a sawi.

Robert Romawia chuan SEDP chungchang sawiin, "Kumin bik state budget-ah earmarked sa leh pawh khawm sa belhkhawm chu cheng nuai 86,000 a ni a, state budget páwn lam aṭanga hmuh belh beisei nen chuan rethei leh dâwmkân ngai chhungkaw tam tak dâwm kânna tham a nih bakah, hmasawnna ruhrel siam ṭeuhna tham a ni," a ti. "Congress-in an sorkar aṭanga kum thum hnu, 2011-ah cheng nuai 23,400-in NLUP bul an ṭan a, Pu Zoramthanga ho chuan ni 100 chhung lekin cheng nuai 86,000 zet kan nei thei a ni," a ti bawk.