Chief Minister-in Jordan Centre a hawng College thlenga zirna dah a la ṭul ang - CM

Ruihhlo ngaite enkawlna hmun chang­tlung zawk ni tura thuam ṭhat Jordan Centre, Seṭhawn chu nimin khan chief minister Zoramthanga'n a hawng. Chief Minister chuan, Jordan Centre-ah college thlenga zirna dah a la ṭul tur thu a sawi.

CM Zoramthanga chuan, Jordan Centre chu India rama chhanchhuahna centre ṭha ber ni tura thuam a ṭul thu a sawi a, "Mizoram páwn aṭang pawha pan tlâk ni thei tura buatsaih a ṭul. High school aṭanga college thleng zirna dah a la ṭul dawn a, infiamna lam pawh la tih belh tur a ni," a ti.

Zu leh ruihhlo ngaite chhanchhuah chu MNF sorkar tirh aṭanga an tum a nih thu sawiin Zoramthanga chuan, "SEDP leh kan election manifesto-ah pawh kan dah. Sum leh pai sèn a ngaih pawhin sèn kan inhuam," a ti a; zan khat lek nu leh pate lungmuang taka an awm pawh man tam tak a nih thu a sawi.

Chief Minister chuan, Jordan Centre-ah thawktu awm sa bakah mi 139 lâk belh a ni tawh tih sawiin, "Hna diltu zingah doctor an awm lo a, sorkar doctor neih sate deputation-a kaltir theih dan a awm ang. Taksa damna bakah, thlarau damna thlenga kaihhruai tur an ni a, kohhrante pawhin rawngbawltu an la dah duh a rinawm. Sorkar ringawta thawh aiin kohhran leh NGO-te nena ṭanho a hlâwk dawn a ni," a ti.

Social Welfare minister Dr K Beichhua pawhin thu sawiin, Jordan Centre-a thawk turte'n an hna chu sorkar hna anga an ngaih chuan rei lo têah bàn an duh leh thuai thei tih a sawi a, "Pathian hna anga ngaih tur a ni. Centre hi chhanchhuahna duhtu apiang tan pan theih a ni. An hriselna endik a, ruihhlo kaihhnawih bakah natna dang an neihte enkawl a ni ang," a ti a; eizawnna lam hawi thiamthil nei tura inkaihhruaina hmun a nih nghal tur thu a sawi.

Jordan Centre hawn inkhawm hi Social Rehabilitation Board vice chairman K Liantlinga'n a kaihruai a; Social Welfare director A Vanlalzawni tarlan danin, Seṭhawna ruihhlo ngaite enkawlna hmun hi February 24, 2019-ah Jordan Centre tia hming thlakin bul ṭan ṭhat a ni.

Centre atan hian kum 2019-20 khan SEDP aṭangin cheng nuai 932.27 dah a ni a; chumi hmang chuan in awm sa 50 thawm ṭhat a ni. In pahnih sak ṭhat a ni a, in thar 11 sak belh a ni bawk. Biak-in pahnih, damdawi-in pakhat, infiamna hmun hrang hrang leh centre-a awmte riahna tur leh thawktute awmna tur peih tawh a ni.