Haulawng leh Pûkpui inkar kawng thawm ṭhat dan ṭha tâwk loah ngai

YMA Sub-Head­quarters, Lunglei hruai­tute chuan April 6, Thawhlehni khan Bhavya Constructions-in Hau­lawng leh Pûkpui inkar kawngpui thawm ṭhat hna an thawh mek a hmunah an endik a; kawng an thawm ṭhat chuan duhthu a sâm lo hle tih an tarlang.

Lunglei Sub-Hqrs YMA chuan, Bhavya Construction-in kawng an thawm ṭhat mek chuan a hmuna enfiahtu YMA hruaitute duhthu a sâm lo hle tih tarlangin, "Kawng siamna hmanrua inchawhpawlh ṭha tâwk lo avanga nghet ṭha lo lai te, kawng chhuat rualrem lo lai hmun eng emaw zatah hmuh a ni," an ti.

Kawng siam mek chuan a daih rei dawn loa an ngaih thu tarlangin Lunglei YMA chuan, "Tun dinhmunah hmun ṭhenkhat chu a rualrem lo em em a, lirthei tlân hrehawm khawpin a awm. An kawng siam hian fûr khat pawh a dâwl dawn loa a lan avangin YMA Sub-Headquarters, Lunglei chuan ṭha a ti lo hle a ni," an ti a; Bhavya Constructions hotute zinga kawng siamna hmuna awmte an sawipui bakah, kawng siam enkawltu ber pawh phone hmanga an biak thu an tarlang.

YMA Sub-Headquarters, Lunglei chuan, kawng thawm ṭhat viltu PWD mi thiamte chu ngun zawka kawng siam vil tur leh ṭha zawka siam a nih theih nan theihtawp chhuah turin an ngen a, "Kawng siam mek hi ṭha taka siam a nih theih nan kan en zui zel dawn a ni," an ti.