Serchhip bial tana ṭha ber tur kan dah - Lalthlengliana

MNF vice president Lal­thlengliana chuan nimin khan Serchhip Press Club-ah thuthar thehdarhtute a kâwm a; Serchhip biala by-election awm turah MNF vice president Vanlal­zawma chu bial tana ṭha ber tur an ngaih avangin an dah niin a sawi.
Lalthlengliana chuan, candidate paruk­te chu party-te'n mi ṭha leh fela an ngaiha an dahte an nih thu sawiin, "Mi fel tak pawh hi an awmnain a zir loh chuan an felna hman theih lohin a awm ṭhin. MNF chuan he bial tan hian Pu Vanlalzawma kan duh ber. 

Ram leh hnam rawngbawlnaah tawnhriat tam tak nei a ni a, Central YMA President, MP term hnih leh MLA ni tawh a ni," a ti. Serchhip bialah tih tur tam tak a awm tih an hriat thu sawiin Lalthlengliana chuan, "Kum 10 chuang Chief Minister bial ni chunga heti khawpa in hnufûm hi ná kan tihpui che u. Pu Zawma in thlang tling a nih chuan a hmalakna tinréngah MNF chuan kan ṭawiawm tlat dawn a ni," a ti a; MNF candidate thlang turin Serchhip bial mipui a ngen a ni.