KHAWTHLIR

EVM/VVPAT peihfel
Serchhip biala Assembly by-election-a hman tur vote thlakna kháwl, electronic voting machine (EVM) leh voter verifiable paper audit trail (VVPAT) puahchahna hrang hrangte chu nimin khan zawh a ni. Election Commission of India hnuaia EVM siamtu company pahnih zinga pakhat zawk, ECIL mithiamte enpuinain nimin khan Serchhipah EVM commissioning tih a ni a; vote thlâkna khawla ballot paper thun, VVPAT khawla symbol dah luh, sealing, tagging leh packing zawng zawng zawhfel a ni. Strong room-ah an dah leh nghal a ni.

VDMC tan training
Champhai District Disaster Management Authority chuan nimin khan IPR auditorium-ah Khawbung RD block chhunga Village Disaster Management Committee (VDMC) member 35-te tan training an buatsaih a, Champhaia IPRO Dr Lallawmkima'n a hmanpui. VDMC din dan, Village Disaster Management Plan siam dan leh State Disaster Response Fund (SDRF) inkaihhruaina chungchangte an inhrilhfiah a ni.

Inven dan inzirtir
AH&Vety department chuan nimin khan Serchhipah hmun dang aṭanga ran lâk luh leh hri léng thei laka inven dan tur inzirtirna an buatsaih a; VC hrang hrang aiawh, YMA Sub-Headquarters aiawh, YMA branch hrang hrang aiawh, ran vulhtu pawl leh sa zuar pawl aiawhte an tel a ni.

Heroin man
Excise & Narcotics department leh Assam Rifles-te chuan April 6, Thawhlehni khan Hunthar Veng, Aizawlah heroin gram 75 an man a, a neitua puh mi panga an man tel bawk. Heroin an man hi tualchhunga hralhna ang chuan Rs. 33,75,000 vel man a ni.

SRH-ah mi 11 awm
State Referral Hospital-ah nimin khan Covid-19 vei mi pali dah luh thar an ni a, anni nen hripui vei mi 11 enkawl mek an ni. SRH-ZMC Bulletin tarlan danin, mi 11 zinga pahnih chu ICU-ah enkawl niin, pakhat zawk chu ventilator hmantir a ni a, mi dang zawng Isolation ward-ah an awm. ZMC laboratory-ah April 7, 2020 khan swab sample endik ṭan a ni a, nimin kha sample endik ṭan kum khat tlinna a ni.