Dampa Tiger Reserve vengtute'n Thla 6 chhung hlawh la tawh lo
Dampa Tiger Reserve venhim hna thawk mektu, Tiger Protection Force-te chuan thla ruk chhung hlawh an lâk tawh loh avangin an lungawi lo a, April 5, Thawhṭanni aṭang khan hna an thawh tawh loh bakah, vawiin hian West Phaileng-a an office complex-ah lungawi lohna lantirin an pungkhawm dawn.
Tiger Protection Force (TPF)-te hnen aṭanga Vanglaini thu dawn danin, October 2020 aṭangin hlawh an la tawh lo a; sorkar hotute chuan sum awm ang ang pawt khawmin thla thum hlawh pek an tum a ni.
TPF-te chuan, member 170 vel an ni a, Dampa Tiger Reserve chhunga dan loa lut ru turte hmun 25 velah an vên ṭhin thu sawiin, "Ṭum dangah chuan April-September hlawh hi a hlawmin kan la a, October aṭanga March inkar chu thla tin kan dawng ṭhin. Mahse, nikum October thla aṭang khan tun thlengin hlawh kan la tawh lo," an ti a; chhungkaw châwm nana hmang eng emaw zat an awm avangin hrasatna an tawh thu an sawi.
Sorkar laipui aṭanga sanction a awm loh avangin hlawh lâk tur a awm loh thu sorkar hotute'n an hrilh tih sawiin TPF-te chuan, "Reserve huam chhung tihchangtlunna tur chu an dawng a, hna thawh kal lai pawh a awm reng. Chutih laia a veng him tura hna thawktute hlawh tur a tel ve lo hi hriatthiam harsa kan ti hle a ni," an ti.
An harsatna chungchangah hian April 6, Thawhlehni khan TPF aiawhte leh department hotute an ṭhukhawm a; sorkar hotute chuan, sorkar laipui aṭanga an hlawh tur an dawn loh avangin a remchan dan ang anga sum pawt khawmin, thla thum hlawh tur pek an tum thu an hrilh.
TPF-te chuan thla thum hlawh tur chu tun kar chhunga tifel turin an phût a, a bâk thla thum dang hlawh tur pawh April thla chhung ngeia tifel turin an phût bawk.
TPF-te hian an lo ruahman lâwk tawh angin vawiinah lungawi lohna lantirin West Phailengah an pungkhawm dawn a; naktuk aṭang erawh chuan sorkar hotute'n an ngen angin hna thawh chhunzawm an tum. An hlawh April thla chhunga an hmuh kim loh chuan May 1, 2021 aṭangin lungawi lohna lantir an tum a ni.