Covid-19 chungchanga Mizorama Inkaihhruaina thar tur sawiho a ni

Health minister Dr R Lalthangliana hoin nimin khan a pisaah sorkar hotu te, khawtlang hruaitute leh kohhran hruaitute'n Covid-19 laka invên dan tur an sawiho. State Disaster Management Authority hnuaia State Executive Committee-in inkaihhruaina thar tur an ruahman thuai dawn thu tarlan a ni.

Dr R Lalthangliana chuan, Covid-19 vanga Mizoramin hun khirh a hmachhawn laia local/village task force-te inpeknaah lawmthu a sawi a, "Kan inthlahdul mek nia a lan lai hian India ramah Covid-19 hrik (variant) thar a thawk leh a, mithiamte an mangang hle. March thla tàwp lam aṭangin Mizoramah positive an pung leh ta a, April thla kar khat chhung ringawtin positive thar mi 32 kan han nei a, a tam zawk chu ram páwn aṭanga rawn haw an ni," a ti a; Mizoram dinhmun dik tak hriatthiam a har rih thu a sawi.

A rang thei ang bera hmalak dan tur ngaihtuah a ṭul thu sawiin Minister chuan, "Chî-âi tur erawh kan ni lo. A hma anga theihtawp chhuaha kan ṭan tlàn chuan kan hlawhtling leh ngeiin ka ring," a ti. Covid-19 spokeperson Dr Pachuau Lalmalsawma chuan, India ramah Covid-19 natna hrik chhuak thar UK variant (B.1.1.7), South African variant (B.1.351) leh Brazilian variant (P.1)-te hmuh a nih tawh thu a sawi a, "Hrik thar hi a lan chhuah dan (symptom) a danglam deuha hriat a ni a, mithiamte'n an zir chiang mek," a ti a; hri thar chu a hma aiin a darh chak a, inkài chhawn a awlsam zawk thu a sawi.

Ṭhutkhawmah hian Mizoram Kohhran Hruaitute Committee, Joint NGO Coordination Committee, Mizoram Village Council Association leh Aizawl City Local Council Association aiawh te, Health Secretary leh DMR Secretary-te an tel a; hripui laka invenna atana hmalakna turte an sawiho a ni.