Taxation-in kum 2020-21 chhungin Chhiah Rs. 6,77,83,53,824 an hmu

Taxation department chuan kum 2020-21 chhungin chhiah chi hrang hrang Rs. 6,77,83,53,824 (nuai 67783.53) an hmu a, hmuh tura ruahman target chu cheng nuai 7770.83-in an khûm.

Taxation department aṭanga thu dawn danin, kum 2020-21 chhunga chhiah hmuh zat tura an ruahman chu cheng nuai 60,000 a ni a; sorkar kum tawp, March 31, 2021 a thlen erawh chuan Rs. 6,77,83,53,824 an hmu a, target chu Rs. 77,83,53,824-in an khûm ta a ni.

Kum 2020-21 chhungin Taxation department hian cheng nuai 2209.54 an hmang a, Re. 1 an hmanin Rs. 30.38 zel an hmu leh (thawh chhuak) ang a ni. Mizoram budget (revised estimate)-ah receipt chu Rs. 6,00,13,27,000 a nih laiin, a taka hmuh zat chu Rs. 6,77,83,53,824 a nih avangin, revised estimate aia a taka hmuh zat a tam zawkna chu Rs. 77,70,26,824 a tling.

Taxation department hian kum 2019-20 chhung khan Rs. 6,67,28,72,503 an hmu a, chu chu kum 2020-21-ah chuan Rs. 10,54,81,321-in an khûm a, an khûmna hi 1.58% a ni.

Taxation department-in kum 2020-21 chhunga chhiah a hmuh zawng zawng Rs. 6,77,83,53,824 zingah Goods & Services Tax (GST) aṭanga hmuh a tam ber a, GST bika an hmuh zat chu cheng nuai 54,872 a ni. GST baka chhiah an hmuh tam zualnate chu Mizoram Value Added Tax leh Professional Tax-te a ni.

Taxation department hi Mizoram sorkar hnuaia department zingah State Own Tax Resource (SOTR)-a chhung lut tam ber an ni ṭhin a; kum 2021-22 chhunga chhiah chi hrang hrang an hmuh zat tura an ruahman lâwk chu Rs. 6,50,00,00,000 a ni.

Kum 2020-21 chhungin Covid-19 hripui léng avangin sorkar leh mimalte'n harsatna hrang hrang an tawk tih sawiin, Taxation department pawhin tax revenue a hmuh ṭhin angte a hmu pha lo nasa a, April 2020-ah phei chuan cheng nuai 1435 chiah an hmu tih an tarlang.

Covid-19 léng avanga sum lak luh a tlem avangin thawktute an infuih thar a, kawng hrang hrangin ṭan an la tih sawiin Taxation department chuan, "Tax return file lote reminder pein, theih ang angin an ṭanpui a. Tax Deduction at Source (contract hna aṭanga chhiah chhùn luh)-te pawh a theih ang anga chhuiin hmalak a ni," an ti.