Digitization of Museum Objects hawng

Art & Culture minister R Lalzirliana chuan nimin khan Mizoram State Museum-ah internet kaltlanga museum bungraw vawn ṭhat leh mipui hmuha pholan theihna tur 'Digitization of Museum Objects' a hawng a, Museum a fang nghal.

R Lalzirliana chuan, Art & Culture department chu hnam ral lohna tura humhalhtu a nih thu sawiin, "Hnam ro hlu kan neihte a taka vawnga dahṭhatu an ni a, hnam thil tak tak khawihtu an nih avangin ram leh hnam tan an hlu hle a ni," a ti.

Museum-a bungruate tunlai thiamna hmanga vawn ṭhat leh pho chhuah a ni tur chu hmasawnna a nih thu sawiin Minister chuan, "Hmasawnna rahbi thar kái thei tura theihtawp chhuaha mahni zâwn ṭheuha mawhphurhna ṭha taka hlentu thawktute inpekna a lawmawm tak zet a ni," a ti.

Ministry of Electronics and Information Techno­logy hnuaia Centre for Development of Advance Computing (CDAC) leh Ministry of Culture-te chuan India hmarchhak state-a museum-te'n an thil vawn ṭhatte internet kaltlanga an pho chhuah a, mipuiin an hmuh theih nan leh digital hmanga an vawn ṭhat nan museum portal northeastheritage.in a siam a ni.

Portal-ah hian Mizoram State Museum pawh telin, bungrua 26 an thehlut tawh a, CDAC chuan Mizoramah digitization of museum objects a taka kalpui a nih theih nan Mizoram tan Rs. 4,50,000 hû bungrua a rawn thawn tawh.

Mizoram State Museum-ah hian thil (object) 3,890 a awm mek a, gallery hrang hranga showcase 107-ah thil 706 pho chhuah niin, a dang zawng chu reserve collection room-ah vawn ṭhat a ni.