Sipai ṭan tum mi 1,500 vel inziak tawh

Aizawl district bawrhsap Dr Lal­hriatzuali Ralte hoin nimin khan DC conference hall-ah sorkar hotute'n sipai lâk rûnpui neih tura inpuahchahnate an thlirho. He hunah hian, sipai lâk rûnpuia tel tum mi 1,500 vel an inziah luh tawh thu an tarlang.

Kumin May 1-8 chhungin Rajiv Gandhi Stadium, Aizawlah sipai lâk rûnpui neih a ni dawn a, inlan tumte chu joinindianarmy.nic.in ah inziah luh tur a ni. Army recruiting director (Aizawl) RS Dhingra tarlan danin, kumina Mizorama Army Recruitment Rally chu Mizote pual liau liaua buatsaih tur a nih thu leh, April 17, 2021 thleng inziah luh theih a nih thu a sawi.

Sipaia ṭan tumte endikna chu uluk taka kalpui tum a nih thu sawiin RS Dhingra chuan, "Mizo ṭhalai hrisel pangngai tan chuan physical fitness paltlang a har lo. Chutih rualin, tlak phah theihna thil - beng-êk fai lo, tattoo nei leh thil dangte a awm a, joinindianarmy.nic.in ah en chian hmasak a ṭha," a ti a; Covid-19 laka himna tura sorkarin inkaihhruaina a siamte khauh taka kalpui a nih dawn thu a sawi bawk.

DC hoa ṭhutkhawmah hian, rally atana sorkar department hrang hrang, Central YMA, Salem Veng YMA leh Salem Veng LC-te mawhphurhna turte an rél a; tihpuitu emaw, pawisa séng emawa tlintir thei tua insawitute lakah fimkhur turin thuneitute chuan sipaia ṭan tumte an chah a ni.