Scho' sem turin MSU-in sorkar an phût

Mizo Students’ Union (MSU) chuan, Post Matric Tribal Scholarship sem tur sum sorkar laipui aṭangin kum 2020-ah a rawn thlen tawh laia tun thlenga zirlaite hnena sem a la ni lo chu hriatthiam har an tih thu an tarlang a; a rang lama sem chhuak turin Mizoram sorkar an phût.

MSU tarlan danin, Ministry of Tribal Affairs (Scholarship Section)-in May 6, 2020-ah Letter no. F.No.20014/22/2018-Sch hmangin Mizorama Post Matric Tribal Scholarship first instalment tûr cheng nuai 1179.18 chu Mizoram Finance department-ah a pe (sanction) tawh a, chu chu first instalment-a sorkar laipui tum tur 25% a ni.

Ministry of Tribal Affairs (Scholarship Division) chuan March 27, 2021 khan letter no.19012/04/2017-Edu/Sch(Pt) hmangin post matric scholarship first instalment pek chhuah tawh zirlaite hnena sem chhuahnate a rang lama thawn turin Mizoram sorkar a lo hriattir tawh bawk.

Kum 2020-21 atana sorkar laipuiin Mizorama scholarship a sem chhuah zat tura a buatsaih chu cheng nuai 5240.81 a ni a, chu'ng zinga 90% (cheng nuai 4716.73) chu sorkar laipui tum tur niin, a bak 10% (nuai 524.08) chu Mizoram sorkar tum tur a ni.