Arecanut Plantation Pilot Project hawng
Land Resources, Soil & Water Conservation (LRSWC) minister R Lalzirliana chuan nimin khan LRSWC conference hall-ah SEDP hnuaia Rubber & Allied Crops Development Board hmalakna, Arecanut Plantation Pilot Project a hawng.
Hawnna inkhawmah hian Rubber & Allied Crops Development Board vice chairman Lalrinsanga, MLA pawh a tel a; Kelsih leh Dàrlawng khuaa mi 20 ve ve hnenah kuhva chìn bul ṭanna tur Rs. 25,000 ṭheuh sem nghal a ni.
R Lalzirliana chuan, "Vawiina kuhva chìnna atana sorkarin bul ṭanna a pekte hi sorkar chawimawi lêttu ni tur leh mi dangte chawk phûrtu ni turin ka duh che u," a ti a; kuhva chu hralhna tur a huphurhawm loh thu a sawi.
Rubber & Allied Crops Development Board hian ṭhelrêt, kuhva, coffee, hmunphiah leh thil dang ṭhenkhat atan sum awm theite ngaihtuahin project an siam a; kumina SEDP hnuaia kuhva chíngtu turte chu Kolasib district-ah chhungkaw 160, Aizawl district-ah chhungkaw 78 leh Mamit district-ah chhungkaw 62 an ni.