Speaker-in Assam leh Arunachal a tlawh

Legislative Assembly speaker Lalrinliana Sailo chuan April 6, Thawhlehni khan Arunachal Pradesh Assembly Secretariat a tlawh a, April 3 khan Assam Assembly Speaker a lo tlawh tawh bawk.

Arunachal Pradesh Assembly a tlawhnaah Lalrinliana Sailo hi Assembly secretary Kago Habung leh a thawhpuite'n an lo dawngsawng a; National E-Vidhan Application (NEVA) an kalpui dan zawtin, a hriat duhte an lo hrilhfiah.

NEVA hi dan siamna hmanrua tichak tura duan a ni a, paper hmang loa information inpek tawnna remchang niin, India ram pumah state legislature zawng zawng inthlunzawmna tur a ni. Arunachal Pradesh hi NEVA hmang hmasa state pali zingah a tel a ni.

Lalrinliana Sailo hian April 5 khan Arunachal khawpui Itanagar-a Synod Mission Field-a awmte a tlawh bawk.

Speaker Lalrinliana Sailo hian April 3, 2021 khan Assam Assembly speaker Hitendra Nath Goswami a lo kâwm tawh a, NEVA chungchang a sawipui. HN Goswami chuan, Mizoram Legislative Assembly-in NEVA atana ruahmanna an thehluh chu a hmuh tawh thu sawiin, Mizoram Assembly-in NEVA an hmuh ve ngei a rin thu a lo hrilh.

Hitendra Nath Goswami chuan, NEVA chu Orissa, Himachal Pradesh, Kerala leh Goa state assembly-te'n hma an lâk tawh thu leh chu'ng state palite chuan NEVA chu eng emaw chen an hman mek tawh thu a sawi.

Inkawmnaah hian Bangladesh leh a chhehvel aṭanga ram dang mi, a rûka India rama lut ṭhin chungchang an sawi bawk a; Assam Speaker chuan, Bangladesh aṭangin a rûka dan loa Assam-a lut an tam thu sawiin, dan loa lut rute chungchanga hmalakna turin mahni state-a chief minister ve vete hnenah thlen ni se, an ti a ni.