COVID-19: Mizoram dinhmun Hripui vei mi 8 hmuh belh a ni

April 6, Thawhlehni khan Mizoramah Covid-19 vei mi pariat hmuh chhuah a ni a, an zingah tualchhunga kái pali leh natna (symptom) lang chhuak paruk an awm. Nimin khan hripui laka fihlîm tawh mi pakhat chu SRH-ZMC aṭangin chhuahtir a ni.

Covid-19 vei hmuh thar mi pariatte chu mipa leh hmeichhia pali ve ve niin, ZMC laboratory-a hmuh chhuah mi pakhat leh RAT hmanga hmuh chhuah mi pasarih an ni a; TrueNAT-PCR hmanga swab sample endik zingah hripui vei an awm lo.

Mizoramah Covid-19 vei mi 4,508 hmuh chhuah a ni tawh a, mipa 3,275 leh hmeichhia 1,233 an ni. Nimin tlai dar 5 thleng khan mi 4,451 (98.74%) chhuahtir an ni tawh a, mi 11 (0.24%) thi tawhin, enkawl mek mi 46 (1.02%) an awm.
April 6, Thawhlehni khan ZMC laboratory-ah swab sample 55, TrueNAT-PCR hmangin Siahaah sample pali leh RAT hmangin district 10-ah sample 1,090 endik a ni a; sample endik zawng zawng chu 1,149 niin, chu'ng aṭanga hripui vei hmuh pariat chu 0.70% a ni.

Covid-19 positive hmuh thar mi pariatte chu Mizo pali leh hnam dang pali an ni a; tualchhunga hri kái mi pali zingah an kàina hriat chian loh mi pathum an awm a, natna (symptom) lang chhuak mi paruk an awm bawk.
April 6, 2021 thlengin Mizoramah swab sample 2,57,181 endik a ni tawh a, chu'ng aṭanga Covid-19 positive hmuh tawh zat 4,508 chu 1.75% a ni. Hripui vei hmuh tawh zinga mi 2,143 chu Mizoram chhunga kái chhâwng an ni a, mi 2,365 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,667 hmuh chhuah a ni tawh a, TrueNAT-PCR hmangin 679 leh RAT hmangin 1,161 hmuh chhuah a ni tawh.

Covid-19 vei hmuh tharte

ZMC laboratory-a hmuh:
Falkawn - 1: Hmeichhia kum 30, frontline worker, March 31, 2021-a Kolkata aṭanga haw, ina inkhung lai, symptom nei.

RAT hmanga hmuh:
Lengpui Airport - 1: Mipa kum 25, Mizoram páwn lam mi Mumbai aṭanga rawn lut, symptom nei lo.
Tlangnuam - 1: Hmeichhia kum 3, an hnaivaia hripui vei hmuh tawh vanga ina inkhung lai, symptom nei.
Zarkawt - 3: Hnam dang mipa 2 leh hmeichhia 1, nupa kum 45 & 35 leh an fa kum 11 mi, symptom an neih avanga damdawi-ina inentirnaa sample endik, hri kàina hriat loh.
Dawrpui - 1: Hmeichhia kum 29, Guwahati aṭanga haw, Vairengte screening point-a hmuh chhuah, symptom nei lo.
Ramhlun North - 1: Mipa kum 42, Lucknow aṭanga haw, Vairengte screening point-a hmuh chhuah, symptom nei lo.