MPCC-in Zoram Medical College hming MIMER-a thlâk lêt turin sorkar an phût

Mizoram Pradesh Congress Committee (MPCC) Media department hotute chuan April 27, Inrinni khan Aizawl Press Club-ah thuthar thehdarhtute an kâwm a; Mizoram Institute of Medical Education and Research (MIMER) hming thlakna Zoram Medical College tih chu MNF president Zoramthanga hming chawina nia an hriat thu an sawi a, MIMER tia thlak lêt leh turin sorkar an phût.

MPCC Media chairman Lallianchhunga chuan, kum 1996-a prime minister HD Deve Howda-a'n Mizoram a tlawh ṭumin Lal Thanhawla kaihhruai sorkarin damdawi-in lian leh medical college Mizoramin a mamawh thu an lo thlen tih a sawi a, "PM chuan ngai pawimawhin, khum 300 awm theihna tur, khum 500 thlenga tihlen theih tur referral hospital sakna atan Planning Commission kaltlangin cheng vbc. 40.53 a rawn pe a ni," a ti.

Lallianchhunga chuan, kum 1998 aṭanga MNF sorkarin damdawi-in main building sa mumal loin, staff quarters an buaipui hmasa tih sawiin, "Building sak quality a chhe em em a, cheng vaibelchhe tam tak hmang ral siin, Mizoram tana ro tling tur Referral Hospital tur an tichhe ta vek a ni," a ti. Hna an thawh dan chu DoNER deputy secretary DK Singh-a’n September 18, 2005-ah a endik a, MNF sorkarin cheng vbc. 35.39 a hman danah an lawm loh avangin sorkar laipuiin sum la hmuh tur cheng vbc. 5.5 a pe duh tawh lo tih a sawi.

Kum 2008-a Congress party-in sorkarna an siam hnuah Referral Hospital chu tuaihnûm a nih thu sawiin Lallianchhunga chuan, "December 10, 2012 khan khum 150 awm theihna tura hlankai a ni a, MNF sorkarin an tihchhiat vek hnuah medical college din tumna a awm a, February 19, 2014-ah Ministry of Health & Family Welfare aṭangin college din tura hmalak nan cheng vbc. 189 ruahman a ni," a ti a; Medical Council of India (MCI)-in vawi eng emaw zat an endik hnuah May 15, 2018-ah Ministry of HFW-in MBBS seat 100 awmna tur hawn phalna 'Letter of Permission' a pek thu a tarlang.

MPCC Media Chairman chuan, MIMER hming chu MNF sorkara Council of Ministers meeting-ah 'Mizoram Medical College' tia thlak rawt a ni tih sawiin, "Ruahman lâwkna leh ngaihtuah lâwkna awm eih loin, minister pakhatin an party president Pu Zoramthanga hming chawi nan 'Zoram Medical College' tih a rawt a, chu chu an pawm ta zawk a. Hming thlak chhan hi chanchinbu leh TV lama an puan dan chuan, 'A hming lam a nawm zawk nan' tih a ni," a ti.

Lallianchhunga chuan, MIMER hian MCI aṭangin phalna famkim a la nei lo a, Letter of Permission chauh a nei tih sawiin, "LoP chu MIMER hminga hmuh a ni a, endikna eng emaw zat hmabak a la nei. Hetiang a nih mek laia hming thlak hian nghawng a nei pawi dawn hle a, MNF hian an ngaihtuah pha lo a ni," a ti a; MNF sorkar thil tih dan chuan thawktute leh zirlaite a tihhnual thu a sawi.

MPCC Media Chairman chuan, MNF thil tih dan chu MIMER hmasawnna tur awm si loa sorkar hmasa thil tih a nih vanga hming thlak a nih thu a sawi a, "Medical lam zirna in sáng kan neih ve tâk avanga lawm em em Mizoram mipuite zahna pakhatmah nei loa hmasawnna aia hming thlak ringawt an buaipui hi a mak kan ti tak zet. MCI-in a hming atana a lo pawm tawh MIMER hming puttir leh turin sorkar kan phût tlat a ni," a ti.

MPCC hotute sawi danin, MIMER hming thlak hian nghawng tam tak a nei dawn a, MIMER hminga MCI-in phalna a pekna te, Mizoram Legislative Assembly-in ruang dah phalna dan a siam te, file leh document pawimawh zawng zawng a nghawng dawn. Hun kal zel turah, research tih nan hman a nih theih nan te, chutiang atana sum hâi chhuah zel nante research institute tih a ni.