Lirthei intlân chhâwk dan thar siam Thla khatah vawi 4/5 din a ngai dawn

Coordination Committee on Traffic Management hotute April 25, 2019-a an chairman Lalchamliana, Home minister pisaa ṭhukhawm chuan, Aizawl khawpuia lirthei intlàn chhâwk danah ruahmanna thar an siam. Ruahmanna tharah chuan, lirtheite chu thla khatah vawi li emaw, vawi nga emaw an din a ngai tawh dawn.

Coordination Committee on Traffic Management-in ruahman-na thar a siam ang chuan, lirthei registration number 1 leh 2-a tawpte chu Thawhṭanni apiangin an tlân chhuah phal loh a ni dawn a; registration number 3 leh 4-a tawpte chu Thawhlehni-ah, number 5 leh 6-a tawpte chu Nilaini-ah, number 7 leh 8-a tawpte chu Ninganiah leh, registration num 9 leh 0-a tàwpte chu Zirtawpni apiangin tlân chhuah phal loh a ni ang.

Intlân chhâwk hian Inrinni leh Pathianni bakah sorkar chawlh a huam dawn lo a; kumin June thlaah enchhin nan kalpui ṭan tura tih a ni. Tuna intlân chhâwk dan kalphung hman mekah chuan, lirtheite chu an registration number tawp ber leh ni zat a inanin tlan chhuah phal a ni lo a, lirtheite chu chawlhkar khatah vawi thum ṭheuh (Pathianni tlak dan azirin vawi hnih pawh) an chhuak thei lo ṭhin.

Intlan chhâwk hman mek hian Pathianni chiah huam loin, Inrinni leh government holiday zawng zawng pawh a huam vek a; ruahmanna tharah erawh chuan Inrinni, Pathianni leh government holiday-te a huam tel ve lo thung.