Hnamin ral lam pana hriat vangin Fa nei tam turin kohhrante'n ṭan an la
Mizorama kohhran pawl hrang hrangte chuan Mizorama nau piang zat (rate) a pun theih nan hma an la mek. Hnam hmasawnna leh zahawmna atan tam a pawimawha hriat a nih laiin, Mizoramah nau pian dan rate hi a hniam telh telha a lan vangin, Kohhran hrang hrangte hian inzirtir ṭulin an hria a ni.
Statistical Handbook 2018
Economics & Statistics department-in Statistical Handbook, Mizoram 2018 tun hnaia an tlangzarha a lan danin, kum 2017 chhungin Mizoramah nau piang 21,431 an awm a, a hma kum, 2016-a piang zat 22,497 aiin 1,066-in a tlem zawk. Chutih laiin, kum 2017 khan Mizoramah mitthi 6,191 an awm a, kum 2016-ah mi 6,422 an thi thung.
Nau piang zat hi Mizorama district pariat zinga panga - Aizawl, Mamit, Champhai, Serchhip leh Lawngtlai district-ahte kum 2016 aiin 2017-ah an tlem zawk vek a; district pathum - Kolasib, Lunglei leh Siaha district-ahte erawh chuan nau piang zat kum 2016 aṭangin kum 2017-ah an pung a ni.
Mizoram Synod hmalakna
Mizoram Presbyterian Kohhran chuan Synod Inkhawmpui 2018-ah khan fa nei tam tura inzirtir leh hmalak an rel a; bawhzui tura ruat Synod Executive Committee (SEC) pawhin a ngaihtuah tawh. SEC chuan hmalak dan tur zir chianga duang turin Committee a din leh chhawng a, Committee chuan an bawhzui mek a ni.
Committee-a chairman Rev. B Sangthanga, Synod executive secretary chuan Vanglaini palai zawhna chhangin, Synod Inkhawmpui thurel, fa nei tam tura inzirtir leh hmalak chu an bawhzui mek a, report-te an peihfel hunah SEC-ah an thehlut ang a, SEC-in hmalak zui dan tur a la rél dawn tih a sawi.
Synod Inkhawmpui hnuhnung ber report-a a lan danin, Mizoram Presbyterian Kohhran inchhiarna hnuhnung ber (August 31, 2018) ang chuan, kum 2017-18 chhung khan Presbyterian kohhranah nau piang mi 8,657 an awm laiin, mitthi 3,784 an awm a; mitthi zat let chuang hret piang an awm a ni. Kum 2017 report (August 31, 2017)-ah chuan, September 2016 - August 2017 chhungin nau piang 8,675 awmin, mitthi 3,660 an awm a; September 2015 - August 2016 chhungin nau piang 9,084 leh mitthi 3,795 an awm bawk.
Kohhran mal hmalakna
Mizoram Synod hnuaia tualchhung kohhran ṭhenkhat chuan an kohhran chhungah member punna rate-in hniam lam a pan zel avangin, nau piang an pun theih nan hma an la mek a; tualchhung kohhran eng emaw zat chuan an kohhran member, fa nei apiangte hnenah lawmman/nau enna pawisa fai an pe ṭhin.
Hriat mai theih chinah, Presbyterian Kohhran bikah chuan, Aizawla Chanmari, Chanmari West, Tlangnuam, Luangmual Vengthlang leh Ramhlun North kohhrante chuan an kohhran member, nau nei tharte hnenah nau enna/lawmpuina pawisa an pe ṭhin. A tlangpui thuin naute pakhatah Rs. 1,000 - 2,000 an pe ṭhin a, phîr an nih chuan naute pakhat an pek let zel an pe ṭhin a ni.
Presbyterian Kohhranah hian tualchhung kohhran hrang hrangah a kum tèlin piang zat an tlahniam zela hriat a ni. Mizorama tualchhung kohhran lian ber, Mission Veng kohhranah chuan inchhiarna hnuhnung ber (August 31, 2018)-ah chuan kum khat (September 2017 - August 2018) chhung khan nau piang 36 an awm laiin, mitthi 39 an awm a, piang aiin thi an tam zawk.
Kohhran lian ber dawttu Chanmari Kohhranah chuan nau piang 47 awmin, mitthi 22 chauh an awm a, anni hi naute nei thar apiang hnenah lawmman pe ṭhin an ni. Presbyterian Kohhrana tualchhung kohhran lian dang zingah, Electric Veng Kohhranah pawh nau piang 35 awmin, mitthi 33 an awm a, piang leh thi an inzat thuak. Kohhran tê zingah, Thakthing Veng kohhranah chuan kum 2017-18 chhungin nau piang 14 awmin, thi 10 an awm a, kum 2016-17 ah phei chuan nau piang pakua awmin, mitthi 11 an awm a, piang aiin mitthi an tam zawk a ni.
Baptist Kohhran
Baptist Church of Mizoram (BCM) chuan nau piang an pun theih nan fa neih tam inzirtirna hi kum 2017 vel aṭang khan an lo kalpui tawh a; BCM tualchhung kohhran zingah an kohhran member, naute thar neite hnena lawmman pawisa pe eng emaw zat an awm.
BCM associate general secretary (Service) Rev. Lalbiakliana'n Vanglaini zawhna chhangin, BCM Assembly-in fa nei tam tura inzirtirna kalpui a rel hnuah a remchan ang angin hma an la tih a sawi a, "BCM hmunpui aṭangin awareness campaign ang chite kan nei a, pastor-te'n an bial chhung ṭheuhah a remchan ang angin an sawi bawk ṭhin," a ti.
UPC (NEI)
UPC (North East India) pawhin kum 2018-a General Conference an neihah nau piang an pun theih nana hmalak an rel a, tunah hian an bawhzui mek. UPC (NEI) general secretary Rev. R Lalrinsanga hnen aṭanga thu dawn danin, an inkhawmpui lian thurel bawhzuiin, UPC (NEI) chuan tunah hian fa nei tamte hnenah lawmman an pe mek a; fa panga nei chinah Rs. 500, fa paruk nei chinah Rs. 700 pein, a aia tam neiah lawmman an pek zat pawh a pung zel a ni.
