KHAWTHLIR

Bial inkhawmpui
Mizoram Presbyterian Kohhran hnuaia pastor bial hrang hrangte'n April 26, Zirtawpni aṭanga bial inkhawmpui an hman chu nizan khan a ṭiak. Bial inkhawmpuiah hian Inrinni khan nilengin ro an rél a, nimin khan chawhnu inkhawmah Lalpa Zanriah Sakramen an kîlho. Mizoram Synod hnuaiah pastor bial inkhawmpui hi April thla Pathianni vawi lina tlaa neih ṭhin a ni.

Thisen pe
Inrinni khan Paithar Bial ṬKP chuan Chawntlangpuiah blood donation camp neiin, Lawngtlai District Hospital tan thisen unit 44 an pe a, petute hi mipa 39 leh hmeichhia panga an ni a; Bawngkawn Bial ṬKP pawhin Synod Hospital tan thisen unit 33 an pe a, petute hi mipa 31 leh hmeichhia pahnih an ni. Christ Redemption Youth, Muallungthu chuan MIMER-ah thisen unit 12 an pe. Aizawl Civil Hospital tan PYD NE Tlangnuam-te’n unit 29, Servant of God ten unit 4, Vaivakawn unit ṬKP-te’n unit 8 a pe a, individual donor 12 an awm bawk.

Puithiam nemnghet
Roman Catholic Aizawl Diocese bishop Most Rev. Bishop Stephen Ro­tluanga chuan hun puma rawngbawltu an neih thar, Deacon Henry Laldinmawia chu dam chhunga puithiam ni turin Inrinni khan a nemnghet. Nem­ngheh inkhawm hi St. Lawrence Church, Ramthar Veng, Aizawlah neih a ni a; Father atana nemngheh thar Henry Laldinmawia s/o Calesta Hranghnuna, Muthi hi Zo hnahthlak zinga Catholic puithiama nemngheh 32-na a ni.

Mei zu vâi
Champhai Anti Tobacco Squad chuan an chairman Dr Naveen Aggarwal, district bawrhsap hoin Inrinni khan COTPA Section-4 tlawhchhanin Champhai Bazar an enfiah a, puipunna hmuna mei zu mi paruk an man. Champhai ATS chuan, puipunna hmuna meizûk chu COTPA bawh­chhiatna leh hrem theih a nih avangin, mipuite chu puipunna hmuna mei zu lo turin an ngen a ni.

Vahia centenary
Siaha districta Vahia (Vahai) khua chuan April 25-26 chhung khan an khaw centenary an lawm. Kum 100 tlin hriatrengna puala Centenary Park an siam leh lungphun an phun chu MADC executive member K Chhuabei-a’n a hawng. In 170 vel awmna Vahia khua hi kum 1905-a din a ni a, an khaw kum 100-na tak chu kum 2005 ni tawh mah se, tun hnaiah an lawm a ni.