World Veterinary Day hman a ni

April 27, Inrinni khan Mizoram hmun hrang hrangah Indian Veterinary Association, Mizoram State Vety Council leh AH&Vety department bultumin World Veterinary Day hman a ni.

World Veterinary Day hi Siaha-ah chuan State Veterinary Hospital-ah hman a ni a; inkhawm kaihruaitu veterinary officer Dr R Zapaw Azyu chuan, World Veterinary Day chu kum 2000 aṭanga hman ṭan a nih thu sawiin, "Office Internationale Desepizootics leh World Veterinary Association-te ṭangkawp chuan ran vulhtute tana ṭangkai tur thupui thlang chhuakin, kum tin April-a Inrinni hnuhnung berah hman ṭhin a ni," a ti.

Dr R Zapaw Azyu chuan, World Veterinary Day chu ram changkang zawkte'n an hlut a, programme lian tham tak an siam ṭhin tih sawiin, "Ran vulha tui mite leh ran ngainatute'n hlim tak leh hlâwkpui thamin hun an hmang ṭhin," a ti a; ran hmangaihna leh lainatna thinlung tak tak Mizote'n an put a hun tawh thu a sawi.

Siahaa World Veterinary Day pual hian Free Anti-Rabies Vaccination (ui â hri danna) pek a ni a, ui 71 pek a ni.

Champhaiah chuan World Veterinary Day hi AH&Vety Hospital kawtah hman a ni a, thupui chu 'Ran hri venna hlutna' tih a ni. Chief Vety officer Dr C Lalsawiṭhuama chuan, ui hri venna chu a thlawnin ui neitu kalkhawmte hnenah pek tur a nih thu sawiin, "Ui a hri hi natna hlauhawm tak a ni a, ui chauh ni loin, mihringte pawhin an kai theih avangin tihdam theih ni mah se, ui a hri danna hi ngaih pawihmawh a ṭul," a ti.

Dr C Lalsawiṭhuama chuan, ui chu ran dangte ang lo takin a vulhtu mihringte'n an ngainat bik ṭhin thu sawiin, "Kan chênpuiin kan mutpui a, kan innghêng hnai bik a, kan infiampui fo ṭhin avang­in mi an seh hrim hrim bakah, tihpalh thil thuah an hain min hliam palh a awm thei a ni," a ti a; a hun taka ui a hri danna lak ṭhin a pawimawh thu a sawi. Champhaiah hian Day pualin ui 32-te a thlawnin hri danna pek a ni.

World Veterinary Day pual hian Mamitah chuan Vety Hospital-ah hun hman a ni a, ui hri danna a thlawnin ui 64 hnenah pek niin, ran damlo 15 an endik bawk.