Online-a dilna thehluh dan zirho

Kumin Lok Sabha General Election hun chhunga Model Code of Conduct hman laia state sorkarte'n hmasawnna hna kal lai an thawh theihna tur, Election Commission of India (ECI) emaw Chief Electoral Officer, Mizoram aṭanga awlsam zawka phalna/dilna lak theih dan 'MCC Relaxation Request Online Portal' chungchangah Inrinni khan Planning department conference hall-ah inhrilhhriatna hun buatsaih a ni.

Joint CEO H Lianzela chuan, Model Code of Conduct chu ram puma inthlan zawhfel a nih hma chuan zawm tura tih a nih thu a sawi a, ECI-in a hranpain a náwlpuia thlahdulna atana phalna (blanket relaxation) a pe thei lo tih sawiin, "Amaherawhchu, online portal hmang hian hmasawnna tura hnathawh tur MCC vanga tihkhaihlakte chhunzawm a nih theih nana hman ṭangkai theih a ni dawn a, April 29, 2019 aṭangin phalna dil nan hman theih a ni ang," a ti.

MCC Relaxation Requests Online Portal hi department hrang hrangte hman ṭangkai tur a ni a, ziaka a dilna thehluh ngai loin, awlsam takin a hman theih dawn. Department-te'n hnathawhna tura dilna an thehluh hi State Level Screening Committee-ah a lut ang a, ngaihtuah a nih hnuah CEO kaltlangin ECI hnenah a subject azir­in thawn an ni ang. ECI hotute'n an thu­thlukna chu department-ah an hrilh leh dawn a ni.