LADC V/C inthlan tur tidanglam hret

Lai Autonomous District Council (LADC) huam chhunga village council inthlanpui neih tur leh chumi ruala Chakma Autonomous District Council (CADC) huam chhunga V/C by-election neih dan tura State Election Commission (SEC)-in ruahmanna a siam tawh chu tihdanglam hret a ni.

SEC-in V/C inthlan dan tur a tihdanglam dan chuan, V/C chuh tuma hming pek luhte endik hun atana ruahman April 25 chu April 30 (Thawhlehni)-ah sawn a ni a, inhnuhdawh theih hun chu May 1, tlai dar 5 thleng hawn a ni dawn a, May 2-ah candidate-te symbol tur târ chhuah a ni ang.

V/C inthlannaah hian May 8, Nilaini zing dar 7 leh tlai dar 4 inkarah vote thlak a ni dawn a, postal ballot hmanga vote thlak a ni ang. Vote thlak zawh veleh vote tlate chhiar nghal tur a ni. V/C thlan tharte chuan May 14-ah executive body an insiam fel tawh tur a ni a, in­thlan kaihhnawiha tih tur zawng zawng chu May 17, 2019-ah zawh vek tawh tur a ni.

LADC huam chhungah hian V/C 95 a awm a, V/C member tur 469 thlan tur niin, mipa 374 leh hmeichhia 95 thlan tur a ni. CADC chhunga V/C by-election neihna turte chu V/C paruk a ni a, member 12 thlan tur a ni.