Serchhip MJA-te'n Tuirial HEP an tlawh

MJA, Serchhip district member-te chuan April 25, 2019 khan IPR department bultumin Press Project Site Visit an nei a, Tuirial Hydro Electric Power an tlawh.

Serchhip MJA member-te hi NEEPCO SDO Lalsanglura Pachuau leh Samuel Lalthanmawia ten an lo dawngsawng a; Tuirial HEP chungchang kimchang taka lo hrilhin, a hmunah khawl hrang hrangte an enpui a, khawl hnathawh dante an hrilhfiah a ni.

Lalsanglura Pachuau chuan, Tuirial HEP siam­na atan cheng vbc. 1,400 ruahman a ni tih a sawi a; tunah hian Tuirial HEP aṭangin kawlphetha siam chhuah reng a ni tih sawiin, "Khawl pahnih hmangin megawatt 60 siam chhuah theih ni mah se, Mizoram SLDC-in ruahmanna siam angin, megawatt 20 vel siam chhuah mek a ni," a ti.

Tuirial HEP-a kawlphetha siam chhuah theih zat aia tlem siam chhuah a nihna chhan sawiin Lalsanglura chuan, "Harsatna hrang hrang thleng thei veng chunga power siam chhuah zat atan hian ruahmanna siam a ni a, fûrah chuan tam zawk siam chhuah a ni ang," a ti a; Mizoram sorkar leh NEEPCO inremna angin, kawlphetha siam chhuah zinga 12% chu Mizoram sorkarin a thlàwnin a dawng a, a bak chu Mizoram sorkarin a lei ṭhin tih a sawi.

Lalsanglura Pachuau sawi danin, Tuirial HEP aṭanga kawlphetha siam chhuah Mizoram sorkarin a leina rate chu - kawlphetha unit khatah Rs. 4.55 a ni a, chutih rualin, rate hi a danglam ṭhin. Tuirial HEP aṭang hian ni khat (darkar 24)-ah darkar riat chhung kawlphetha an siam ṭhin a ni.