Eizawnna kawng inkawhhmuh

Small Industries Development Bank of India (SIDBI) leh Cod Nerc chuan hmeichhiate eizawnna kawng kawhhmuhna leh nun kawng zirhona hun, April 27, Inrinni khan Saron Veng YMA Hall-ah an buatsaih a; Armed Veng, Bethlehem Veng, Bethlehem Veng­thlang, Chhhinga Veng, Khatla, Republic Veng, Saron Veng, Tuikual leh Tuithiang aṭangin hmeichhia eng emaw zat an tel.

Cod Nerc hotu B Lalchhanzova chuan, hmeichhiate thiamthil tihpun leh eizawnna atana ruahmanna siamsak chu Mizoram economy tihchak nan thil pawimawh a nih thu a sawi a, "Mizoram páwna kal chhuah kher ngai chi ni lem lo leh hautak chiam si lo eizawnna tur thiamthil, mahni in lum aṭanga kalpui mai theih tur thiamthil pek uar deuh deuh a ṭul a ni," a ti.

Cod Nerc hian SIDBI puihnain hmeichhiate tan pickle siam, bati siam leh artificial flower siamte an buatsaih dawn a, chuta tan chuan zirhona hi an buatsaih a ni. Zirhonaah hian professional personality development trainer Jeffrey Lalramdina'n thil pawimawhte a zirtir a; SIDBI assistant manager Lalrem­tluangi pawhin a telpui a ni.

Cod Nerc hian hmei­chhe lam tan nun kawng zirtirna lam, eizawnna kawng kawhhmuh, thiam thil (skill training) lam mamawhte tan group loan pek an kalpui a, hmei­chhe bik tan mi 2,000 vel tan loan cheng nuai 600 a pe chhuak mek a ni.