Kan budget hi a chî tur chauh a ni - Chief Minister

Nimin khan Mizoram hmun hrang hrangah Civil Services Day hman a ni a, Aizawlah chuan Vanapa Hall-ah hman a ni. Aizawla hmannaa khuallian, chief minister Zoramthanga chuan, sorkar laipuiah sum hai chhuah tur a tam thu sawiin, "Kan budget hi chu a chi tur chauh a ni," a ti.

Civil Services Day hi chief secretary Lalnunmawia Chuaungo-in a kaihruai a; CM Zoramthanga chuan, kum 1998-a MNF-in sorkarna an siamin an budget hmasa bera plan fund chu cheng vbc. 459 a nih thu sawiin, "Tunah chuan kan budget hi cheng vaibelchhe sang pawh ni lo, vaibelchhe sing chuang a ni tawh. Chutah kan budget pangngai bak Central aṭanga hai luh tur tam tak a awm. Kum hnih/thum kal ta aṭang khan budget-a 10% chu hmarchhak tana dah a ni," a ti a; sorkar laipui sum chu a thál thiam thiam tan a nih thu a sawi.

Chief Minister chuan, sorkar laipuia sum thâl tur awm chu thâl a ni ngai lo nia sawiin, "Sum thàl tur tam tak awm si a, a hman nachang kan hre lo a, kan chán tam lutuk hi a pawi. State budget pawh a tam, Central-ah pawh a tam a, a hmangtu tur lah mi maktaduai khat âwrh chauh kan ni. Chuti chung chuan kan la rethei hle si. Kan budget hi chu a chi tur chauh a ni," a ti.

Mizorama chengte'n rilru an thlâk phawt chuan ṭàmna ram chu malsawmna ramah a thlak theih tih sawiin CM Zorama chuan, "Mipui a lêt thum, a lêt li châwm zo thei ram kan nei a, sik leh sá lah duhthusam kan nei. Ram ṭha tak nei siin India ramah per capita income-ah kan hniam hle si. Israel leh Japan mi maktaduai khat kan ramah hian chemtum nen kum 10 awm se, India rama per capita sang ber an nih ka ring," a ti a; leilet pawh Mizo mipui châwm zo thei buh thar theihna siam tur a awm thu a sawi.

Zoramthanga chuan, mihringte chu talent ropui tak pek an nih thu sawiin, "Eng ang potential (theihna) nge kan neih tih kan hriat a pawimawh. He kan potential neih hi kan hman a ngai a, chumi atan chuan tumruh a pawimawh. A thim zawnga thil kan thlir chuan tih theih kan nei lo ang a, a êng zawnga kan thlir chuan engkim kan ti thei ang," a ti.

Chief Minister chuan, civil service-te chu ram ruangám leh ruhrel pui tak tak an nih thu sawiin, "In tel lo chuan ni khat pawh a kal thei lo. Chuvangin, rinawmna, taimaknate nen kan ram hi socially leh economically-a chenna tlaka siam turin engtiangin nge hma kan lak ang tih ngaihtuah a ngai," a ti a; theihtawpa ram leh hnam tana an theihna hmang turin a sáwm.

Civil Services Day hmannaah hian Chief Minister Award for Excellence in Public Administrator sem a ni a, organisation-ah lawmman pakhatna Planning and Programme Implementation department hnenah hlan niin, pahnihna chu MIRSAC hnenah hlan a ni. Team-ah chuan Kolasib DC office-in pakhatna lawmman an dawng a, pahnihna chu UDPA department an ni.