Sorkar sum dinhmun a ṭha - Finance dept.

Finance department hotute chuan, tun dinhmunah Mizoram sorkar sum dinhmun a ṭha a, Treasury hrang hrangte chu sum pek chhuah theih zat bithliahsak ni mah se, sorkar hnathawk hlawh bikah chuan ceiling siam a ni lo niin an sawi.

Finance department-in April 23, 2019-a Mizoram sorkara Treasury hrang hrangte ni khata sum an pek chhuah theih zat tur a bithliahah chuan, Mizorama Treasury 10-te'n ni khata sum an pek chhuah theih zat belhkhawm chu cheng nuai 760 a ni a; chu'ngte chu 'Pension & ORBs' ah cheng nuai 270, 'Personal claim' ah nuai 250 leh 'Contingent' ah nuai 240 a ni.

Sum pe chhhuak tam thei ber Aizawl South Treasury chu ni khatah cheng nuai 160 pek chhuah phalsak niin, Aizawl North Treasury chu nuai 75, Lunglei Treasury chu nuai 85, Saiha Treasury leh Champhai Treasury chu nuai 70 phalsak an ni a; Kolasib, Serchhip, Lawngtlai, Mamit leh Chawngte-a treasury-te chu nuai 60 ṭheuh pek chhuah phalsak an ni thung.

Finance department-in treasury-te sum pek chhuah theih zat bithliah chungchanga Vanglaini palai zawhna chhangin Finance hotute chuan, daily ceiling siam chu tihhniam vak a awm lo a, ṭhenkhatah erawh chuan tihhniam a awm thu leh, sorkar hnathawk hlawh (salary) atan chuan ceiling a awm loh thu an sawi.

Mizoram sorkar sum dinhmun a ṭha tih sawiin Finance hotute chuan, "Thla hmasa khan a ṭha vak lo deuh a, Central lam aṭanga sum an rawn release tlai vang a ni. Kan dinhmun a ṭha a, mahse, ren lo taka hman huau huau chi erawh a ni lo," a ti.

Finance department hotute chuan, sorkar hnathawk hlawh ngaih pawimawh a nih thu sawiin, "A ṭul a nih chuan ways and means te, loan-te pawh lak mai tura tih a ni," an ti a; MNF sorkar hnua hna thawhna atana sum hman tam tak chu sorkar hmasa policy - NEDP hnuaia sum dah, la hman lohte a nih thu an sawi.