Village Profile 2017-18 tlangzarh a ni
Economics & Statistics department-in Mizorama khaw hrang hrang dinhmun an zir chianna tarlanna, ‘Village Profile & Development Indicators 2017-2018 : Mizoram State’ tih an buatsaih thar chu nimin khan Directorate of Economics & Statistics conference hall-ah Planning secretary Dr C Vanlalramsanga’n a tlangzarh.
Tlangzarhna inkhawm hi Economics & Statistics director Lalchhuanawma Hrahsel-in a kaihruai a; Dr C Vanlalramsanga chuan, Village Profile & Development Indicators 2017-2018 chu thingtlang khaw hrang hrangte mamawh dik tak hriat nan a ṭangkai hle dawn tih sawiin, sorkar official-te leh khawtlang hruaiutte chu hmang ṭangkai turin a chah.
Dr C Vanlalramsanga chuan, "Khaw tam takah chuan an khaw mamawh zawh a nihin, khawtlang hruaitute'n field leh hall an sawi ṭhin. Field leh hall-te hi mipui mamawh ber a ni lo a, mamawh dik tak zawk chu khaw mipuite kawng tinrenga an hmasawnna tur, ni tin mamawh ṭha taka an hmuh theihna tur hi a pawimawh hmasa chu a ni. Chu'ng atan chuan Village Profile & Development Indicators hi a ṭangkai hle dawn a ni," a ti.
Technical report petu Economics & Statistics deputy director B Lalrinhlua chuan, village/locality profile siam chu state sorkarin hmasawnna kawng hrang hranga hmalak dan tur atana ruahmanna a siamnaa ṭangkai tur a nih thu leh, Sustainable Development Goals (SDG) kalpui mek chu state level-ah chauh ni lo, district, RD block leh village/locality level-a tihhlawhtlin a nih theih nan a ṭangkai dawn tih a sawi.
B Lalrinhlua sawi danin, Village Profile Indicators siam tur hian khawpuia veng (urban locality) tin leh thingtlanga khua (rural vilage) zawng zawng tuam chhuakin survey an nei a; sector 13 huamin tehkhawng 240 siam a ni. Sorkarin district, block leh village/local level-a hmasawnna a ruahman nan, mamawh leh mamawh vak rih lohte hriat chian nan a pawimawh hle dawn.
Economics & Statistics department hian Science & Technology department-a MIRSAC nen ṭang dunin ‘GIS-Based Village/Locality Profile 2017-2018’ an siam bakah, LAILEN Consulting Pvt. Ltd. nen ṭang dunin ‘Web-Based Village/Locality Profile 2017-2018’ an siam bawk a; Web-Based Village/Locality Profile-a kimchang chu department website www.des.mizoram.gov.in-ah pawh en theih a ni.