Myanmar ram aṭanga Mizorama Ráltlante V/C-ah din ve an tum

Lai Students' Association (LSA) chuan thuchhuah siamin, Lai Autonomous District Council (LADC) huam chhunga village council inthlanpui, May 8, 2019-a neih turah Myanmar sipai leh Arakan Army-te an inkah vanga Myanmar aṭanga Mizorama rawn ráltlân Zakhine leh Kawl (Burmese) ten vote thlak ve bakah, candidate neih ve an tum tih an tarlang a; ráltlante thil tih dan chu an duh loh thu an puang.

LSA president H Vanlalṭanpuia hnen aṭanga Vanglaini thu dawn danin, Zakhine leh Káwl raltlante hi Mizoramah kum hnih/thum bak an la awm lo. Chutih laiin, LADC-a V/C inthlan awm turah nomination file tumte an awm a, mahse, Lawngtlai DC Shashanka Ala-i'n a hriat hnuah nomination form-ah tribal certifcate thil tel a ngaih thu hriattirna (notification) a tichhuak a ni.

Lawngtlai DC chuan, tribal certifcate chu Young Lai Association (YLA) leh V/C ni lai hriatpuina tel lo chuan pek chhuah theih a ni lo, tih thupek a chhuah a; LSA chuan, Lawngtlai Bawrhsap hmalak dan chu fakawm an tih thu an sawi.

LSA chuan, Myanmar aṭanga rawn raltlante khawtlang rorelnaah inrawlh an tum ve leh ram leilung fate chanvo chan tuma hma an la chu pawi an ti a, an ngai thutak hle tih tarlangin, "A tawp thlengin kan dodal tlat dawn a, eng pawh tih kan huam a ni," an ti.

Political party-te chu an party lalna tur chauh ngaihtuah lo a, ram leh hnam himna ngaihtuah chunga Myanmar raltlante chu vote an neih theihna tur zawnga hma lakpui lo turin LSA chuan an ngen a; Myanmar raltlante Mizorama vote an neihna tur leh V/C an chuh theihna tur zawnga thil kaltlangpui a nih chuan, eng thil pawh thleng se mawh an phurh dawn loh thu an tarlang bawk.