MP candidate serial number tih dik loh vangin Lungleiah FIR thehluh a ni

April 11, 2019-a Mizorama Lok Sabha inthlan laia Lunglei district chhung polling station ṭhenkhata independent candidate pahnih - Lalnghinglova Hmar leh Lalhriatrenga Chhangte te election symbol thlâkthleng a nih chungchangah Mizoram Pradesh Congress Committee (MPCC) Legal department secretary James Thanghmingmawia'n nimin khan Lunglei Police Station-ah FIR a thehlut.

FIR-a tarlan danin, April 11, 2019-a Lok Sabha inthlanah Lunglei district-a khaw hrang hranga polling station-ah MP candidate list dik lo tar chhuah a ni a, Congress party leh ZPM-in an thlàwp independent candidate Lalnghinglova Hmar leh Lalhriatrenga Chhangte te chu an serial number thlakthleng a ni.

Candidate-te serial number thlakthleng chuan voter tam tak a hruai dik lo tih sawiin, "An tum loh zawk vote an awm ngei a ni tih ka hria a, Pu Lalnghinglova Hmar vote tum ngeite hruaisual (misguide) a, an tum loh zawk vote tir ngei tur a nihzia hre chunga tih a ni," tiin FIR-ah ziah a ni.

James Thanghmingmawia chuan, candidate-te serial number tih dik loh chuan pawi nasa tak a khawih tih tarlangin, "He MP candidate list dik lo hi Returning Officer (RO) Pu Vanlalngaihsaka, Aizawl DC leh Pi K Lalrinzuali, ARO, Lunglei DC-te hriatpuina ngeia siam a ni a, chuvangin, RO leh ARO-te chunga dan anga action la ngei turin kan ngen a che," a ti a ni.

MPCC Legal department Secretary hian FIR an thehluh chungchangah nimin vek khan Lunglei Press Club-ah thuthar thehdarhtute a kâwm a, FIR an thehluh chhante a sawifiah. James Thanghmingmawia hi MPCC general secretary Joseph Lalhimpuia bakah, Aizawla MPCC hotu te, Lungleia Congress party leh ZPM hruaitute'n an ṭawiawm a ni.