KHAWTHLIR

MPSC Apps thar
Mizoram Public Sevice Commission (MPSC) mobile application thar, ‘MIPUSEC’ chu a duh leh mamawh apiangte hman turin nimin khan MPSC Mini Examination Hall-ah MPSC chairman Rev. Zosangliana Colney-in a tlangzarh. MPSC mobile application hi Android OS Kitkat Version 4.4 aṭanga Pie Version 9.0 hmangte tana duan phawt a ni a, Google Playstore aṭangin download theih tura duan a ni. Apps hmang hian MPSC website-ah url chhu kher loin hna ruak awmte a hriat zung zung theih dawn a ni.

Thisen pe
Republic Higher Secondary School NSS-te chuan nimin khan an sikulah blood donation camp an huaihawt a, Aizawl Civil Hospital tan thisen unit 74 an pe a, a petute mipa 37 leh hmeichhia 37 an ni.

Fimkhur turin ngen
Traffic SP chuan thupek chhuahin, vawiin aṭanga May 5, 2019 thleng Raj Bhavan hmar lam gate bul (Maenga Traffic Point bul) aṭanga Tuikual ‘A’ mual (H Rammawia te in péng thleng) via Tennis Court kawngpui sirah tui pipe hlui a thara thlak hna PHE department-in an thawh dawn thu a tarlang a; hei vang hian lirthei khalh­tu leh kea kal mipuite fimkhur taka kal turin a ngen a, hnathawh tibuai thei tura kawngpui sira lirthei leh bungrua dah lo turin a hriattir bawk.

Training hawng
Small Industries Deve­lopment Bank of India leh Mizoram Chamber of Industries ṭangkawp chuan nimin aṭang khan thla thum chhung awh tur 'Course in Computer Hardware Maintenance' an buatsaih a, Commerce & Industries Director-in a hawng.

Inên chhâwk ngai
Power & Electricity department chuan, 33kV Chawnpui Sub-Station-a transformer lian siam­ṭhat a nih hma chuan Tuikual North, Tuikual South, Dinthar, Dawrpui Vengthar, New Capital Complex, Bungkawn, Bungkawn Vengthar, Chawnpui, Kanan, 7th Day Tlang, Vaivakawn, Chanmari West, Hunthar leh Tuikhuahtlangte chu an inên chhâwk a ngaih dawn thu an tarlang.