Sorkar hnathawkte'n an hna aia Ngaih pawimawh an nei tur a ni lo - CS

Chief secretary Lalnunmawia Chuaungo chuan, sorkar hnathawkte'n sorkar hna aia ngaih pawimawh an nei tur a ni lo tih a sawi.

Nimina Vanapa Hall-a Civil Service Day hmanaah thu sawiin Chief Secretary chuan, sorkar hnathawkte chu hlawh neia full time-a thawk tura chhawr an nih thu a sawi a, "Mipui rawngbawl tur kan ni a, kan hna aia ngaih pawimawh kan nei tur a ni lo. Kan mawhphurhna kan hlen chhuah hi Pathian rawng kan bàwlna a ni," a ti.

Lalnunmawia Chuaungo chuan, sorkar sum neih hman ringawt chu hlawhtlinna a nih loh thu sawiin, "Budget hman ralte hi hlawhtlinna pakhat ni mah se, hlawhtlinna tluantling a ni lo," a ti a; sorkar hnathawkte chu an sum hman hmangin hmasawnna ngêlnghet an din em tih ngaihtuah ṭhin turin a chah.

Chief Secretary chuan, Mizoram budget zinga a zatve (50%) vel chu sorkar hnathawk hlawh, inrêlbàwlna leh pension hlawhahte hman a nih thu sawiin, "Nikuma hlawh ennawn a nih hnuah phei chuan budget hi sorkar hnathawk tan 60% vel hman a ni. Chuti chungin hma thar lak dawnin, sorkar hnathawk indaih lohna a ri reng tho. A dikna chen awm mah se, sorkar hnathawkte'n kan tih tur kan tih loh leh kan tih loh tur kan tih a tilang chiang a ni," a ti.

Hmasawnna hnathawhah sorkar hna­thawkte'n tih tur chin nei mah se, private sector hman ṭangkai thiam a pawimawh thu sawiin Lalnunmawia chuan, "Hnathawhah kan inrawlh a, kan thawh chuan corruption a hluar. Sorkar hnathawkte chuan scheme, guidelines leh agreement-te siam­in, hnathawh kan vilin kan endik tur a ni," a ti a; ram changkang apiangah sorkar hnathawkte'n hmasawnna hnathawhah private sector an hman ṭangkai thu a sawi.