CYLA-in BSNL pisa an kalhsak

Lawngtlai khawpuia mobile phone leh broadband network ṭha zawk pe tura BSNL an dàwrnain awmzia a nei loa an hriat avangin Central Young Lai Association (YLA) chuan nimin aṭang khan tiam chin awm loin Lawngtlaia BSNL pisa an kalhsak.

BSNL pisa an khârsak chungchangah hian Central YLA chuan, "Kum eng emaw chen Lawngtlaia inbun tawh, hmasawn tum lo BSNL hnenah hian CYLA chuan vawi tam tak ngenna siam tawhin, an office pawh khârsak an lo ni tawh. An service upgrade-na tur atan agreement siam a nih hnuah hawnsak leh an ni a. Amaherawhchu, an agreement anga Lawngtlaia an service-in hmasawnna a neih loh avangin CYLA chuan ngenna a siam nawn leh a. CYLA ngennain ngaih pawimawh a hlawh loh avangin vawiin (April 29, 2019) hian tiam chin awm loin khârsak leh an ni," an ti.

Thu dawn danin, Central YLA chuan tuna BSNL pisa an khârsak chungchangah hian, agreement satliah mai maiah lungawi a tum tawh lo a, Lawngtlai mipui lungawina tur an hmuh hma chu tawlh an tum lo. BSNL pisa an khârsak vanga harsatna tâwk zawng zawngte hriat­thiamna a ngen a ni.