MIMER hming thlak sawiselnate Dap chawp inbeihnaah puhsak
MNF MLA L Thangmawia chuan nimin khan Mizo Hnam Runa inkhawmah thu sawiin, MIMER hming thlak chungchang sawiselna leh demnate chu dap chawp taka inbeihna satliah mai niin a sawi.
Human Resources Development Committee vice chairman L Thangmawia chuan, MIMER hming thlak chungchanga eptu party-te'n MNF president Zoramthanga hming chawia phuah tiin an puh tih sawiin, "A puhtute pawh hian an rilru tak tak chuan an awih ka ring lo. Mizo hmingah chuan hming chawia hming phuah reng reng hi a tawpah 'a' leh 'i' a awm deuh vek a. MIMER hming 'Zoram Medical College' tia thlak an sawisel hi kan CM zahawm tak 'Pu Zoramthanga' hming nen inkaihhnawihna chhetê mah a awm lo," a ti.
L Thangmawia chuan, MIMER hming thlak chungchangah hian, "Dap chawp inbeihna satliah mai mai a ni a, a puhtute hi an khawngaihthlak tak zetin ka hria. 'Hawla Indoor Stadium' tih nen chuan inang lo tak a ni," a ti a; Mizoramah 'Zoram' tih hming chawia thil hming phuah chu a mawi lohna em em a awma a hriat loh thu a sawi.
MNF sorkar chu a danglam hle dawn nia sawiin L Thangmawia chuan, "Mipui fairèl bél thleng phakin hma a la nghal. Sorkar hmasa hnathawh inchhunzawmsak kawngah kan sorkar hi chuan hlamchhiah loin a chhunzawmsak mai ṭhin," a ti.