Inpui ni turin ZPM kan tuaihnûm mek - B Lalchhanzova

ZPM Political Affairs Committee (PAC) member B Lalchhanzova chuan nimin khan an pawl pisaa inkhawmah thu sawiin, party nei ve lote inpui ni turin ZPM an tuaihnûm mek tih a sawi.

Lalmuanpuia Punte kaihhruai ZPM chhung inkhawmah B Lalchhanzova chuan, sorkar kal tawh leh hrawn mekah mipuite'n an hriat lâr chu - sorkar apiangin mipuite chi hnih - party mi leh sa leh an party mi ni lo-ah an ṭhen ṭhin tih a sawi a, "ZPM chuan khaw tin leh veng tinah ZPM unit din kawnga hma kan lak rualin, party neih kher ṭul ti lote zalenna pek pawh kan tum. ZPM hi party nei ve lote inpui ni turin kan tuaihnûm mek zel a ni," a ti.

B Lalchhanzova chuan, ZPM chu mimal emaw, mi tlemte inpunkhawmin an din emaw a ni lo tih sawiin, "Zo fa, khawvel hmun hrang hranga ram vei mite vei chhuah a nih avangin a danglam a, neitu pawh kan tam, mipuiin min tehna pawh a sang a, thil ti ve mai mai thei kan ni lo," a ti. MLA inthlan hnu­hnung berah ZPM-in MLA pariat an nei thei chuan Mizoram mipui duh leh hawi zawng a tichiang nia sawiin, "Party mi leh sa te chauh invulh bikna kan kham tawh a, ZPM chuan mi zawng zawng huapzo sorkar a aupui zel dawn a ni," a ti bawk.

ZPM chhung in­khawm­­ah hian ZPM MLA pathum - Lalchhuan­­thanga, VL Zaithanzama leh Andrew H Thangliana ten thu an sawi ve bawk a ni.