KHAWTHLIR

Thisen pe
Mizoram College of Nursing chuan Evangelical Nurses Fellowship Day pualin nimin khan Civil Hospital, Aizawl blood bank-ah thisen an pe a, hmeichhia 17 leh mipa pathumin thisen unit 20 an pe. Blood bank-a mahnia kala thisen pe (individual voluntary donor) mi 18 dang an awm bawk.

KṬP 2021 thupui
Central Kristian Ṭhalai Pawl (CKṬP) chuan kum 2021 chhunga ram puma zir turin KṬP member-te mahni kutkawiha eizawnna an neih theihna lam an thlang. Kumina KṬP Rorel Inkhawmah KṬP thupui zir tur leh inzirtirna tura thu lutte chu CKṬP Committee thlan turin an dah a, CKṬP chuan 'KṬP member-te'n mahni kutkawih ngeia eizawnna an neih theih nan CKṬP-in inzirtirna nei rawh se' tih chu an thlang a ni.

Central scheme zir
Champhai District Rural Development Agency (DRDA) leh MZU Incubation Centre chuan nimin khan Champhaia IPR Auditorium-ah district chhunga VC-te pualin MGNREGA kalpui dan tur leh Pradhan Mantri Kaushal Vikas Yojana chungchang inzirtirna an buatsaih a, DC Maria CT Zuali'n a hmanpui. Champhai DC chuan MGNREGA kalpui dan chu her danglam tuma ruahmanna kalpui mek a nih thu sawiin, "Sik leh sa awm dan, tha thawh theih zat leh hun sen tam dante zirchiang chung zelin ruahmanna neih a ni," a ti.

SRH-ah mi 10 awm
State Referral Hospital-ah nimin khan Covid-19 vei dah luh thar an awm lo a, nimin tlai thleng khan enkawl lai mi 10 an awm. SRH-ZMC Bulletin tarlan danin, mi 10 zinga pahnih chu ICU-ah enkawl niin, pakhat zawk chu ventilator hmantir a ni a, ngaihtuahawm erawh a ni lo. Mi dang pariat chu Isolation ward-ah enkawl an ni.

Kawng endik rél
Lunglei District Road Protection Squad hotute April 7, Nilainia district bawrhsap Kulothungan A hoa ṭhukhawm chuan, Lunglei khawpui chhunga kawngte ngawrh taka endik turin PWD aṭangin ni tinthawk tur mi pakhat ruat an rêl. Vantlang kawng nêk chêp, tui luankawr chhia, kawng dunga in sakna bungrua dah, phal lohnaa lirthei dah te endik ṭhin an rêl bawk.