Rua/mau-ah Delhi an hmin tawh; A dawhthlêng tur buaipui a ngai - CM

Horticulture changtu chief minister Zoramthanga chuan, mau/rua chungchangah Delhi an hmin tawh niin a sawi a, "A dawhthlêng tur (head of account) buaipui a ngai," a ti.

Nimina Aijal Club-a Mizoram Horticulture Service Association inkhawmpui a hmanpuinaah Chief Minister chuan, "Tissue culture hmanga mau chî siamte chu a thawnna a hlat avangin a thi duh hle. Chuvangin, Dr N Barathi chu an industry Mizoramah rawn zauh mai turin ka ti a, a inbuatsaih mek," a ti a, Mizoramah tissue culture tih a nih chuan thi a tlem tur thu a sawi.

Raw chi siam chhuah lam an buaipui ngat ngat thu sawiin Zoramthanga chuan, "Mizoramah mau kum 40/50 velah a tàm chauh avangin tissue culture tih a ngai. Delhi list-ah a tel lo, an ti a, anni ai chuan kan hre daih zawk. A order siamtu takte phei chuan a hming pawh an hre mumal lo.

Inhrilhfi ah vek ngaihna pawh a awm lo a, kan zawng chawp ve bawk si. Chuvangin, ka risk ka ti a nih kha," a ti. CM Zoramthanga chuan, transportation a awm loh chuan raw lian pui pui put thlen ngaihna a awm loh thu sawiin, "Bamboo link road tiin ka phuah a, economic road pawh a tih theih a, mahse, miin an duh ve dawn. Chuvangin, mi hman ve theih loh kan hmang.

Peace bonus leh BAFFACOS ang chiaha phuahchawp ngai a ni," a ti a, Delhi lam chu an hmin tawh niin a sawi. Bamboo link road atana Delhi aṭanga sum hmuh tur chu vbc. 800 vel a nih mai theih thu sawiin CM Zorama chuan, "Min pek an duh tawh a, mahse, head of account tur an hre lo. Peace bonus pawh head of account tur a awm lo a, non-plan aṭangin min pe. A dawnna tur thlèng kan buaipui mek. PMGSY-ah ti mai ang u, te an ti a, PMGSY hi a guideline a khirh lutuk," a ti.

Zoramthanga chuan, processing atan industry a awm ṭeuh nia sawiin, "Raw material awm loh avangin an ding ṭhup. Nakinah chuan a phuntu mi 100 an awm chuan industry pakhat a awm ngei ngei a ngai dawn," a ti a; horticulture-in industry a la hrin chhuah dawn thu a sawi. Chief Minister chuan, bul ṭan hmasatu nih a hahthlak duh tih sawiin, "India ram state zingah sorkar anga buaipui an la awm lo. Kan dap chawp a, kan zir chawp a ni. Delhi pawhin min hmin ta an ti. Kan sut chhuah vêk vêk chuan hmarchhak bakah, ṭhenawm ram Myanmar leh Bangladesh-te
pawhin an duh dawn," a ti.

Chief Minister sawi ṭhenkhat
 Mizorama industry din turin Dr N Barathi a inbuatsaih mek
 Transporation atan sum hmuh nan bamboo link road tiin ka phuah
 Link road atana hmuh tur cheng vbc. 800 vel a ni mai thei
 Mi 100-in mau an phun chuan industry pakhat a awm a ngai dawn
 A bul ṭan hmasatu nih a hahthlak duh