Sikul 71 hnenah computer sem

Information & Communication Technology (ICT) minister Robert Romawia Royte chuan Mizoramin information technology zirna lama hma a sawn theihna tura hmalakna hnuaiah nimin khan Vanapa Hall-ah sikul 71 hnenah computer a sem.

Computer semte chu North Eastern Council (NEC) hnuaia project 'IT Education Programme for 150 Schools in Mizoram' aṭanga pek a ni a,  implementing agency chu ICT department hnuaia Mizoram State e-Governance Society a ni. Project atana sum ruahman chu cheng nuai 600 a ni a, Mizorama sikul 150-ah computer pek tura ruahman niin, March 2020 khan sikul ṭhenkhatah chuan pek tawh a ni.

ICT Minister chuan, zirna-inah computer a pawimawh tih sawiin, "Computer leina atan Mizoram state sorkar sum hman a ni lo a, computerte hi ṭha tâwk a ni a, zirnaah a ṭha zawnga danglamna a thlen ngei ka beisei," a ti. Robert Romawia Royte chuan, computer sem zinga tam tak chu thingtlang kilkhâwr tak tak a thleng dawn tih sawiin, " Khawtlang pawhin sikul hotute ruahmanna hnuaiah ṭangkai taka an hman theih chuan a lawmawm hle ang," a ti a; computer hmang ṭangkai zualte hnenah lawmman siam a nih dawn thu a sawi.

ICT department chu la naupangin lian lo mah se, an tel lo chuan Mizoram sorkara department ṭhenkhat chu an kal hleih theih tawh loh thu sawiin Robert Romawia chuan, "Department budget tlem mah se, páwn lam aṭanga sum tam zawk hâi luh zel kan tum a, tun aṭanga hun rei lo têah smart classroom kalpui leh tum a ni," a ti.