DoNER Committee-ah MP Rosanga a tel

Lok Sabha MP C Lalrosanga chuan nimin  khan video conferencing hmangin New Delhi-a DoNER Ministry Parliamentary Consultative Committee-ah Mizoram mamawhte a thlen.

Sorkar thuchhuah tarlan danin, C Lalrosanga chuan, Mizorama hmun hnufual bikte tana ruahmanna hran 'Special package' siam turin DoNER a ngen a, "Bangladesh leh Myanmar ramri hrúla inbiakpawhna leh inkalpawhna kawng ṭha zawk siam te, Aizawl thleng chauh ni lo, Mizoram chhim tàwp thlenga rél kawng siam leh ramri hrúla inbiakpawhna ṭha lote siamṭhat vat a ṭul," a ti.

C Lalrosanga chuan, North Eastern Council (NEC) thuam ṭhata thuneihna sang zawk pek ṭul a tih thu sawiin, "Hmarchhak bial hmasawnna chak zawk thlen nan NEC hi tun aia phuisui zawka thuam a ṭul. Mizoramin thlawhna ṭumhmun a mamawh a, tuna airport awm chhunah thlawhna tam zawk siam a ṭul," a ti. Ṭhutkhawmnaa tel Civil Aviation thuneitute chuan, Lengpui Airport-ah thlawhna service tam zawk siam tum mek a nih thu an sawi a ni.

Mizoram Lok Sabha MP chuan, Mizoramah Postal service a ṭhat tâwk loh thu sawiin, dâka lehkha thawn thleng tlai ṭhin tireh turin dâk hotute a ngen a; ministry hrang hrangin hmarchhak state-te tana sum an ruahman 10% Gross Budgetary Support chu a nihna ang taka hman a ṭul thu a sawi bawk.