Candidate zingah Serchhip bial tan ka ṭha ber - PC Laltlansanga

Serchhip biala MLA by-election awm tura Indian National Congress (INC) candidate P C Laltlansanga chuan, candidate zingah Serchhip bial tan a ṭha ber niin a sawi.

PC Laltlansanga hian nimina Serchhip Press Club-a thuthar thehdarhtute a kawmnaah, a candidate puite chu fel leh ṭha tak tak an nih thu sawiin, "Serchhip bial chhung in hmangaihsiakah erawh ka cho. Anni ai chuan he bial tan ka ṭha zawk a, bial chhung mamawh pawh ka hre zawk," a ti a; hna thawk theia amah siam turin mipui kawngaihna a dil a ni.

Serchhip Hmarvenga sei lian, retheihna paltlang tawh, mi hnuaia inhlawh leh hna chi hrang hrang thawk tawh a nih avangin mi rethei leh harsa zawkte dinhmun a hriatthiam thu sawiin PC Laltlansanga chuan, "MLA-a thlan tlin a nih chuan MLA fundte mirethei leh harsa, retheite fairèl bél thleng phakin kan chawi hniam ang. Dam lohna avanga hmunpui pan ngai, sum lama harsatna neite tan pawh," a ti.

INC Candidate chuan, Serchhip bial kher ni lo, hmun danga by-election neih tur ni se a din duh loh tur thu sawiin, "Serchhip biala by-election-a ding tura kan party hotute'n remchang min siamsak hi ka lawm hle," a ti a; Serchhip bial MLA ni a, Serchhip bial hmasawnna hna thawh theih châkin hun rei tak a awm tawh thu a sawi.

PC Lalthansanga chuan, Congress sorkar laiin Serchhip bialah hmasawnna tam tak thawh a ni chungin thawh tur a la tam tih a sawi a, "Sorkar
hmasain hmachhawp a neihte chhunzawm tur leh sorkarin hmalakna a neih mekahte pawh sorkar nawr a, department hotute thawhpui an ngaih huna thawhpuia finchhuah turin, neitu rilru pu tak bialtu MLA neih a ngai a ni," a ti. PC Laltlansanga hi Aizawl aṭangin Congress party hruaitute'n an ṭawiawm a ni.