Lungsenah vawk 276 a thi tawh Vawk sample endik turin thawn

Lunglei district chhung Lungsen khuaah kumin March 21 aṭanga nimin chhun dar 1 thleng khan vawk 276 a thi tawh. Vawk thih chhanah African Swine Fever (ASF) rinhlelh a nih avangin, finfiah turin April 7, Nilaini khan National Institute of High Security Animal Diseases (NISHAD), Bhopal-ah vawk sample thawn a ni.

Vanglaini palai zawhna chhangin AH&Vety director Dr H Laltlanmawia chuan, vawk sample chu an doctor pakhatin April 7 khan Bhopal a panpui tih a sawi a, "Vawiin (nimin) ah Bhopal a thlenpui a ni ang a, result hriat theih hun tur kan la hre lo. NISHAD chiah hi India ramah ran hri léng chungchang fi nfi aha puang chhuak thei a ni," a ti.

AH&Vety Director sawi danin, Lungsen khuaa vawk tam tham tak thih chhan chu ASF a nih chuan hmalak dan tur duan sa a awm a, chumi anga hma la tur chuan AH&Vety department an inbuatsaih lâwk a ni.

April 5, 2021-a Lungsena kal Vety Investigation Team-te'n thil hmuh chhuah thar an neih loh thu sawiin Dr H Lalthanmawia chuan, "Thil awm dan an zir chiang a, ASF an ringhlel ber. Chutih rualin, hri a darh zel lohna atana invenna kawngah hma an la a, doctor ṭhenkhat chuan an la chàmchilh a ni," a ti.

Tarlan tawh angin, Lungsen khuaah hian chhan hriat lohin March 21 aṭangin vawk a thi ṭan a, an thih chhan hriat ni lo mah se, an nat dan leh awm dan aṭangin ASF rinhlelh a ni. Lungsen khua hi nimin khan AH & Vety minister Dr K Beichhua hoin department hotute'n an tlawh a, khawtlang mipuite nen hmalak zel dan tur hrang hrang an sawiho.