Bawlhhlawh hâltu mi pakhat hrem tawh

Mizoram Pollution Control Board (MPCB) chuan, sorkar thupek bawhchhiaa bawlhhlawh hâltu mi pakhat hremin pawisa an chawitir tawh.

Vanglaini palai zawhna chhangin MPCB assistant environment engineer PC Lalmuanpuii chuan, bawlhhlawh hâl chungchangah report pahnih an dawng tawh a, mi pakhat pawisa an chawitir tawh thu a sawi a ni.

PC Lalmuanpuii chuan, "Company pakhat, kawng siamte'n an bungrua ṭhenkhat an hâl chungchangah report kan dawng bawk a, mahse, hna an thawh an zawh tawh avangin an kal bo tawh a, pawisa kan chawitir hman ta lo," a ti a; Aizawl khawpui huam chhung bika dan bawhchhiate hrem chu sorkarin MPCB kutah a dah a, bawlhhlawh hâl vanga an hrem chu Rs. 5,000 chawitir a nih thu a sawi.

Chak taka hmalak zung zung a harsat thu sawiin PC Lalmuanpuii chuan, "Aizawl khawpui a zau si a, hna hrang hrang kan khawih ve bawk nen, thawktu indaih lohna avangin duh angin kan vil zung zung thei lo. Teihtawp chhuaha ṭan lak zel kan tum a, ṭha taka min thawhpui turin Aizawl mipuite kan duh," a ti.

Aizawl DC chuan March 26, 2021 khan thuchhuah siamin, ram ruaka bawlhhlawh hâltu leh ram (simple) hâl/tikângtu chu Rs. 5,000 chawitir theih an nih thu leh, thil lian tham leh tam tham (bulk) a nih chuan Rs. 25,000 chawitir theih an nih thu a tarlang. Hemi chungchangah hian Aizawl khawpui chhunga dan lekkhawh turin MPCB ruat a ni a, district dangah chuan DC-te ruat an ni thung.