Silai license chungchanga sorkar thu

Home Secretary Lalbiaksangi chuan April 7, Nilaini khan silai license chungchangah hriattirna a tichhuak a; April 7, 2021 hnu lama silai license pek thar leh tihnun reng reng chu license pek chhuah/tihnun ní aṭanga kum nga chhung chauh a nun dawn thu a tarlang.

Silai license nun hun chhung hi Ministry of Home affairs-in December 13, 2019-a Arms (Amendment) Act, 2019 Section 15(1) a siamṭhatin a phût anga tih a ni. Home Secretary thuchhuah chuan, mi pakhatin silai pahnih bak kawl theih a nih loh thu tarlangin, "Sorkar laipuiin dan a siam zawm a ṭul avangin license nei zinga silai pahnih aia tam kawlte tan hun remchang siam a ni a, license neitu chhungte zinga danin license a pek theih ang chi mi dang an awm chuan, chu'ng mite hming chuan silai pahnih bak license pek theih a ni lo," a ti.

Hriattirnaa a lan danin, silai pahnih aia tam kawlte chuan hriattirna tihchhuah ní (April 7, 2021) aṭanga thla ruk ral hmain license pe chhuaktu (concerned licencing author ity) hnenah emaw, police station hnai berah emaw phal zat aia tam silai an kawlte chu an dah (surrender) tur a ni a; silai hlante chu thla ruk ral hmain an chhungte hmingin license a tharin an dil leh tur a ni.