Champhai leilet huam chhunga in/kudam Covid-19 chungchanga Satu mi 54-te pawisa cháwi tura tih an ni

Champhai leilet záwl huam chhungah dan loa in/kudam sa mi 54 an awm a, square metre khatah Rs. 1,000 zel cháwi tura hriattir an ni.

Dan loa in/kudam sate chu Khankawn leh Zotlang inkar huam chhung leileta sq.metre 24,587.73-a zauah mi 16 an awm a, an pawisa chawi tur belhkhawm chu Rs. 2,45,87,730 a ni.

New Champhai-Zotlang inkar huam chhungah mi 38-in sq.metre 47,867.65-a zauah in/kudam an sa a, an pawisa chawi tur belhkhawm chu Rs. 4,78,67,650 a ni thung. Champhai leilet huam chhunga dan phal loha in sak zawng zawng chu sq.metre 72,455.38 a ni a, mi 54-in in/kudam an sa a, an sum chawi tur belhkhawm chu Rs. 7,24,55,380 a tling.

Champhai leilet huam chhunga in/kudam sate chu ṭhiat turin April 7, Nilaini khan hriattirna pek an ni a, dan bawhchhiaa leilet an hman avangin sq.m. khat zelah Rs. 1,000 cháwi tur leh, an pawisa chawi tur chu District Collector Offi ce emaw, Land Revenue & Settlement Officer hnenah emaw April 30, 2021 ral hmaa pe turin hriattir an ni.

Vanglaini palai zawhna chhángin Champhai DC Maria CT Zuali chuan, leilet huam chhunga dan loa in/kudam sak eng emaw zat an awm thu a sawi a, "Leilette humhalh a nih theih nan a nihna tur ang ni loa hmangte kan endik a, dan loa leilet huam chhunga in/kudam sate chu ṭhiat turin kan hriattir a, ṭhiat lote chu an pass tihtawp (cancel) sak theih an nih thu kan hriattir bawk," a ti.

Champhai Bawrhsap chuan, leileta kudam awmte chu kuhva dahna vek a nih thu sawiin, "Dan loa thil tih leh sak a nih bakah, heng hmuna hna thawk tura lo kal hnam dangte'n Champhai mipui leh leiletin kan tlan ber Tuipui lui tui an tibawlhhlawh nasa a, eirawngbawlna a an hnawmhnawk leh an zun leh êk thlengin lui tuiah hian a lut a, kan ngaimawh em em a ni," a ti a, chu'ng mite chu chhuak vek thei se an duh thu a sawi.

Danloa kuhva hmanga sumdawngte'n kudam leh an mamawh tur in sak nan leilet neitute hnenah to tak takin leilet hmuna an duh lai an lei ṭhin thu sawiin Maria CT Zuali chuan, "Dan bawhchhiatna a ni a, dan phal loha sumdawnna a ni bawk," a ti a; leilet neitute chu sum ît vanga an leilet hmunte hralh lo turin an zirtir nasat thu a sawi bawk.