National Science Day hman a ni
Nimin kha National Science Day a ni a, Mizoramah pawh Assembly Annexe conference hall-ah hman niin, Higher & Technical Education (HTE) minister Dr R Lalthangliana'n a hmanpui. Kumina Science Day hi Aizawl bakah, district khawpui dang zawngah pawh hman a ni a, thupui chu 'Science for the people and the people for science' tih a ni.
National Science Day hmanna inkhawm hi Planning (Science & Technology) secretary Dr C Vanlalramsanga'n a kaihruai a; minister R Lalthangliana chuan, Mizoram hmun hrang hranga Science Day hmangtu zawng zawngte leh science lama tui leh ngaisangtu zawng zawngte National Science Day chibai a bûk a, "Mizote hi hnam dangte tluk lo tura Pathian siam kan ni bik lo," a ti.
Dr R Lalthangliana chuan, tunlaia technology sang zel chu Mizote ûm phâk loh tura ngaih a nih chuan hmasawn a har dawn tih sawiin, "Chhuk emaw, phei emaw zawnga en thiam chuan a zuamawm a, khûm theih hial turah indah a awl zawk ṭhin," a ti a; science leh technology avangin engkim a awlsam tawh a, chu awlsamna chu hmasawn nan hman loh chuan a chhe zawngin mihring nunah nghawng a neih theih avangin a ṭha zawnga hman tum zel a ṭul thu a sawi.
Sorkarin mihring chherchhuah (manpower development) a ngai pawimawh hle tih sawiin HTE Minister chuan, "Thiamna bik neite phei chu sorkarin nasa lehzualin an thiamna leh theihna tipung turin chher zel a tum. Mizote'n fashion lam an tui vangin Mizoram Institute of Fashion Designing te, skill development & entrepreneurship lam chak zawka kalpui te, tourism lamah khualzinte hîpna tur kawng thar, Mizo ei leh in siam dante thlengin sorkarin a ngaihtuah tel zel dawn a ni," a ti.
Planning secretary Dr C Vanlalramsanga pawhin thu sawiin, "Hun kal zelah science hian mihringte tana ṭangkaina a ngahzia hriat chhuah a ni deuh deuh a, tunah chuan mihring bakah, leilung, boruak, sik leh sá tana him thei ang bera science thiamna hman hi mithiamte tum ber a ni tawh a ni," a ti a; kumina National Science Day pualin Mizo kutchhuak ngei phochhuahna ‘Scientific Innovations Exhibition’ neih a nih thu a sawi.
Chief scientific officer Dr RK Lallianthanga chuan, Science Day thupui a sawi zau a; "Mihringte hi engtin nge science tana an ṭangkai a, science hmasawnna tura an thawk thei ang tih hi a pawimawh hle a ni," a ti a; India rama state 29 zingah Mizoram leh Meghalaya chiah Science & Technology department hranpa la nei lo an nih thu leh, Mizoram sorkar hnuaia college 20 awm zinga pangaah science zirna a awm thu a sawi a ni.
India scientist ropui Sir CV Raman-a'n kum 1030-a Nobel Prize a dawnna chhan 'Raman Effect' a hmuh chhuah ni, February 28, 1928 chu India ram pumah kum 1987 aṭangin National Science Day atan hman ṭan a ni. Mizoramah chuan kum 2006-ah hman ṭan a ni thung.