Minister-in exhibition hawng

Indian Council for Cultural Relations (ICCR), Art Novelty Gallery, Aizawl leh Art and Culture department ṭangkawp buatsaih lem­ziah pholanna 'Cultural Mosiac: An International Art Exhibition' tih chu Nilaini khan Vanapa Hall-ah IPR minister Lalruatkima'n a hawng.

Lalruatkima chuan lemziak hi awmze thuk leh zirchian tham, thawnthu leh zirtir tam tak nei a ni fo ṭhin tih sawiin, "Artist-te kutchhuak aṭang hian hnam ziarang te, culture leh history-te a hriat theih a, hnam chanchin tarlanna hmaraw ṭangkai tak a ni thei a ni," a ti a, Mizorama a vawikhatna atana ICCR bultuma International Art Exhibition buatsaih a ni chu Mizoram art hmasawnna atan thil chhinchhiahtlak tak a nih thu a sawi.

Cultural Mosiac-ah hian India state hrang hrang leh Bangladesh, Bhutan leh Slovakia aṭangin lemziak thiam mi 15 an tel a, an kutchhuak 40 pho chhuah a ni a; March 2 thleng a awh ang.