Aizawlah Chapchar Kût hman a ni

Mizoram sorkar bultumin nimin khan Lammualah Chapchar Kût hman ṭan a ni a, vawiin­ah pui tham zawkin Lammualah vek hman leh a ni dawn a, district khawpui hrang hrangah pawh hman a ni dawn. Kumina Chapchar Kût thupui chu - 'Zo fate inpumkhatna' tih a ni.

Nimina Chapchar Kût hmannaah hian Art & Culture minister R Lalzirliana chu kût pa a ni a, Art & Culture secretary B Lalhmingthanga chu kût thlengtu a ni. Chaw­hma dar 11-ah kût ṭan a ni a, hnam lâm entir a ni lo a, malzai, huho zai leh zaipawlte a awm thung a; naupang pawnto leh thil dangte entir a ni bawk.

Niminah Chapchâr Kut hman ṭan ni mah se, sorkar chawlh a nih lo a, kûtnaa tel pawh an tam lo. Vawiin erawh chu Chapchar Kut ní tak a ni a, sorkar chawlh a nih bakah, item nei tur an tam avangin mipui an tam tawh tura ngaih a ni. Kûtah hian Falam, Tidim, Halflong, Tahan, Shillong, Manipur leh Bangladesh-a Zo hnah­thlak pawl hruaitute sàwm an nih angin an tel.

Kût pa R Lalzirliana chuan, Mizo tih chu Chhìnlung chhuak hnam hrang hrangte phuar khawmtu a nih thu leh a inti neitu apiangte ta a nih thu a sawi a, "Kumina Chapchar Kût thupui pawh 'Zo fate inpumkhatna' tih a ni. Ramri kham dan avangtein ṭawng leh ziarángte dang hlek hlek mah se, kan Mizona a dang chuang lo a, kan ṭawng leh ziaráng hrang hrangte hi Mizo culture tihausatu a ni zawk," a ti.

Art & Culture Minister chuan, ram hmasawn nan inpumkhatna a pawimawh hmasa tih sawiin, "Inlungrualna leh inpumkhatna ṭha nei tur chuan a thlengtute kan pawimawh hle," a ti a; kût hmangtu zawng zawngte hlim taka hmang tura duhsakna a hlan rualin, an awmna apiangah Mizo nun ze mawi leh tlawmngaihna chhawm nung zel turin a chah a ni.

Chapchar Kût pual hian nimin zing dar 6 khan Aizawlah 'Chapchar Kût tlân' huaihawt a ni a; Sikulpuikawn leh Chanmari kâwn aṭangin YMA member-te an tlan a, Lammualah lut khawmin, IPR minister Lalruatkima hoin inkhawm tawi neih a ni.