Duhoma'n MJA conference a hmanpui

Mizoram Journalists' Association (MJA), Serchhip District chuan nimin khan SIRD Auditorium-ah Annual Conf. vawi 12-na an hmang a, bialtu MLA Lalduhoma chu khuallian a ni a, MJA general headquarters president Zonunsanga Khiangte leh hruaitu dangte'n an hmanpui bawk.

Lalduhoma chuan, nimina a hun hman chu ram leh hnam, a bikin Serchhip bial hmasawnna atana an thawhhona bul ṭan­na ni pawimawh taka a ngaih thu sawiin, Serchhip district MJA-in Press Club an sak mek chu a puitlin theih nan theihtawp a chhuahpui tur thu a sawi.

India ramah journalist-te ngaih pawi­mawh an ni a, 'Fourth Estate' tih an nih thu sawiin Duhoma chuan, "Journalist-te chu mipui thlavâng hauhtu, sorkar khalh ngil a, ṭhahnemngai taka hna thawk ṭhin an ni a, thu dik leh belhchian dâwl chauh chhuah tur an n. Social media-ah thu dik lo leh mipui tirálkhèl thei thu post a awm fo a, chutiangah chuan mipuite'n thu dik a nih leh nih loh fiahna atan chanchinbute an hmang ṭhin," a ti.

Khualzahawm, MJA Gen. Hqrs. presi­dent Zonunsanga Khiangte pawhin thu sawiin, journalist-te chu teirei peihna kawnga entawn tlak an nih thu a sawi a, "Mipui­te kawng dik kawhhmuhtu an ni," a ti. Tunlaiah social media a lâr tak avangin mi ṭhenkhatte'n thu dik lo thehdarhna atan an hman ṭhin thu sawiin, "Journalist-te chuan an paper kaltlanga mipuite thu dik hrilha kaihhruai hi kan rawngbawlna a ni," a ti a; journalist-te'n pension benefit an neih theihna turin hmalak mek a nih thu a sawi bawk.

Serchhip District MJA Annual Conf.hi an vice president Kapliana Pachuau-in a kaihruai a; Serchhipa IPRO K Saitluanga pawhin hmanpuiin, Serchhip MJA-te tan tun sokar kum chhungin Tuirial Hydro Electric Power project tlawhna hun siam tum a nih thu a sawi. Serchhip MJA president C Ramengmawia pawhin thu a sawi a ni.

MJA, Serchhip District hi kum 2000-ah Serchhip District Journalists Association tia din a ni a, kum 2007-ah district hrang hranga journalists association-te ṭhiata MJA-a an inchhûn luh lai velin MJA-a lut hmasa ber an ni. Tunah hian member 14 an awm mek a, an zingah Thenzawla mi pahnih leh North Vanlaiphaia mi pakhat an tel a ni.